Республикалық «Біздің таланттар» конкурсының облыстық кезеңі өткізіліп, аудан атынан қатысқан №3 педагогикалық-психологиялық түзеу кабинетінің тәрбиеленушілері жүлделі орындарға ие болды.
Жеңімпаздарға Атырау қаласында «Балалар жылына» орай өткен «Бақытты бала – ел болашағы» атты облыстық фестивальде салтанатты түрде марапаттары табысталды. Атап айтсақ, «Бармағынан бал тамған» номинациясы бойынша Ермағанбет Темірлан 1 орын, «Үздік Декламатор» номинациясы бойынша Айсұлтан Умирғали ІІІ орынды иеленді.
– Ерекше балаларды ұмытпай, осындай фестиваль өткеніне қуаныштымыз. Көп жағдайда, ата-аналар баласының ерекше бала екендігін көрсеткісі келмей, жарыстарға қатысудан қашқақтап жатады. Осы конкурс өткізілетіні туралы естігенімізде, үш ата-ана да жарысқа қатысамыз, баламыздың дамып, жетістікке жеткенін көргіміз келеді деп қолдау білдірді. Алдағы уақытта да балаларымыздың жан-жақты жетіліп, биік белестерді бағындырғанын қалаймыз, - дейді №3 педагогикалық-психологиялық түзеу кабинетінің логопед маманы Фариза Сағынаева.
Жалпы, балалардың талантының танылуына септігін тигізген ұстаздары Фариза Сагинаева, Әсел Мүсілімова, Айнұр Каражанованың еңбегі зор екенін айта кетейік.
ЖАДЫРА НАРИМАНОВА