Атырауда қоғам белсендісі, депутат Нұрлыбек Даралиевтің бастамасымен Қайыршақты ауылдық округіне қарасты Көктем ықшамауданында әлеуметтік осал топтағы төрт отбасыға жаңа баспана табысталды.

 Жаңа қонысқа ие болғандардың бірі – көпбалалы ана Алмагүл Тастанбекова. Ол ұзақ жылдар бойы тұрғын үй кезегінде тұрған.

 – Мен жалғызбасты анамын, алты балам бар. Үлкенім – жиырма жаста, екінші балам студент. 2013 жылдан бері тұрғын үй кезегінде тұрдым. 13 жыл пәтер жалдап келдік. Өзім аспаздың көмекшісі болып жұмыс істеймін. Наурыз айында Нұрлыбек Даралиев үйімізге келіп, жағдайымды көріп кетті. Көмек болатынын айтты. Шынымды айтсам, басында сенбедім. Бірақ сәуірдің басында үй салып жатқанын айтып, мені тізімге қосты. Бүгін балаларыммен бірге үйдің кілтін алып тұрмын. Қуанышымды сөзбен жеткізу қиын, – дейді ол.

Жобаның бастамашысы Нұрлыбек Даралиевтің айтуынша, бұл қайырымдылық бастама пандемия кезінде қолға алынған.

– Пандемия кезінде халыққа өте қиын болды. Көптеген үлкен кісілер өмірден өтті. Сол кезде үлкендердің “балаларымның, немерелерімнің баспанасы болса екен” деген тілектерін жиі еститінбіз. Сол аманатты орындау үшін осы іске кірістік. Кәсіпкер достарыммен, сыныптастарыммен бірігіп бастадық. Бұл бастамаға Фархад Жолдас есімді досым, кәсіпкер Арман Дәукенов, Хамит Қонарбаев және Әділ Жұбанов қолдау көрсетті, – дейді ол.

 Берілген үйлердің әрқайсысы 60 шаршы метрді құрайды. Екі бөлмелі баспаналар толықтай дайын: газ, су және электр жүйелері жүргізілген.

 Айта кету керек, баспаналы болған отбасыларын әлеуметтік қорғау шараларымен қамту жүзеге асырылуда.

Нұргүл Насыр

Атырауда 18 сәуір - халықаралық ескерткіштер мен тарихи орындарды қорғау күніне орай сенбілік ұйымдастырылды.

Атырау облысы Мәдениет және тілдерді дамыту басқармасына қарасты Атырау облысы тарихи-мәдени мұраны зерттеу орталығының ұйымдастыруымен өткен шара Балықшы ықшамауданындағы Бейбітшілік көшесінде орналасқан «Достық» саябағындағы «Ұлы Отан соғысында қаза болған жерлес-жауынгерлерге арналған обелиск» маңында өтті.

Тазалық жұмыстарына орталық қызметкерлерімен қатар Атырау жоғары көпсалалы «Болашақ» колледжінің студенттері де белсенді қатысты. Қатысушылар ескерткіш аумағын қоқыстан тазалап, ағаш діңдерін әктеп, саябақ ішін ретке келтірді.

Атырау облысы тарихи-мәдени мұраны зерттеу орталығының тарихшысы Самалгүл Төлеуованың айтуынша, шараның басты мақсаты – жастар мен тұрғындарды тарихи-мәдени мұраны қорғауға жұмылдыру, мәдени құндылықтарға деген құрметті арттыру және қоғамдағы азаматтық белсенділікті қалыптастыру.

Айта кетейік, сенбілік «Таза Қазақстан» жалпыұлттық экологиялық акциясы аясында және «Қазақстанның Азаматтық Альянсы» заңды тұлғалар бірлестігінің «Мәдениетті мұра» республикалық жобасы шеңберінде жүзеге асты.

Нұргүл Насыр

Атырау қаласында «Таза Қазақстан» жалпыұлттық экологиялық акциясы аясында «Таза аула» сенбілігі өтті.

17 сәуір күні Қазақстан Республикасының Бас Прокуроры Берік Асыловтың төрағалығымен Заңдылықты, құқықтық тәртіпті және қылмысқа қарсы күресті қамтамасыз ету жөніндегі үйлестіру кеңестің отырысы өтті.

 Онда киберқылмыстарға қарсы іс-қимыл бойынша қабылданып жатқан шаралардың тиімділігі мәселелері қаралды. Отырысқа Президент Әкімшілігінің өкілдері, Парламент депутаттары, құқық қорғау және арнайы органдардың басшылары, бейінді министрліктердің, сондай-ақ қаржы ұйымдарының, байланыс операторларының және онлайн-платформалардың өкілдері қатысты.

Отырыс барысында соңғы үш айда киберқылмыстар санының азайғаны атап өтілді. Ағымдағы жылы мұндай құқық бұзушылықтар саны 15,1%-ға (6 216-дан 5 275-ке дейін) қысқарды. Оң динамика мемлекеттік органдардың үйлестірілген жұмысының және Мемлекет басшысы Қасым-Жомарт Тоқаевтың қылмыстық қауіп-қатерлерге реактивті әрекет етуден проактивті әрекет етуге көшу жөніндегі тапсырмаларын іске асырудың нәтижесі болды.

Атап айтқанда, кредит беру саласындағы қауіпсіздік күшейтілді: «салқындау кезеңі» енгізілді, алғашқы қарызды ресімдеу кезінде міндетті жеке қатысу талабы белгіленді және өзге де қорғаныс тетіктері іске асырылды. Байланыс саласында да елеулі өзгерістер енгізілді: SIM-бокстарға тыйым салынды, абоненттерді биометриялық тіркеу енгізілді, операторларға антифрод-жүйелерді қолдану және алаяқтық қоңырауларды бұғаттау міндеттелді. Сонымен қатар, дропперлік үшін қылмыстық жауаптылық енгізілді. Қазақстан Республикасы Қылмыстық кодексінің 232-1-бабы (банктік шотқа, төлем құралына немесе сәйкестендіру құралына қолжетімділікті заңсыз ұсыну, беру және алу, сондай-ақ төлемдерді және (немесе) ақша аударымдарын заңсыз жүзеге асыру) күшіне енген сәттен бастап 446 іс тіркелді.

 Ұлттық банк жанындағы Антифрод-орталық арқылы алаяқтық операциялармен байланысты 2,8 млрд теңге бұғатталды. Сондай-ақ цифрлық активтер саласындағы қылмыстарға қарсы күреске, оның ішінде криптовалюталарды ұрлау схемаларын әшкерелеуге, сондай-ақ виртуалды байланыс арналары арқылы жүзеге асырылатын жаппай алаяқтық қоңырауларға қарсы іс-қимылға ерекше назар аударылды.

Бас прокуратураның Құқықтық статистика және арнайы есепке алу комитетінің құрылымында қылмыстық қауіптер мен қоғамдық қауіпсіздік тәуекелдерін болжау орталығы құрылды. 

2026 жылғы 18 сәуірден бастап Комитетке заңнамалық тұрғыда жаңа функция – мемлекеттік органдар үшін ұсынымдар әзірлеуді қоса алғанда, болжамдық-талдамалық қызмет жүктеледі.

Орталықтың талдауы көрсеткендей, алаяқтық қоңыраулардың едәуір бөлігі мессенджерлер (ең алдымен WhatsApp) арқылы жүзеге асырылады, бұл қылмыскерлер белсенділігінің дәстүрлі телекоммуникациялық инфрақұрылымнан тысқары ауысқанын білдіреді. Орталық 18 жаңа киберқауіпті анықтады, олардың ішінде шетелде орналасқан қылмыскерлердің SMS-бластерлерді (байланыс операторларын айналып өтіп жаппай хабарлама жіберуге арналған құрылғылар) пайдалануы; фишингтік таралымдар мен дипфейк технологиялары; нөмірлерді алмастыру және тіркелмеген SIM-карталарды қолдану схемалары бар.

2026 жылғы 4 сәуірде елде алғаш рет SMS-бластерді пайдалану фактісі әшкереленді, бұл құқық қорғау органдарының киберқылмыстың жаңа түрлерін жедел анықтап, жолын кесуге қабілетті екенін көрсетеді.

Отырысқа қатысушылар ведомствоаралық өзара іс-қимылдың тиімділігін, сондай-ақ құқық қорғау органдары қызметкерлерінің киберқауіпсіздік саласындағы біліктілігін арттыру бойынша жүйелі жұмысты атап өтті.

Отырыс соңында Берік Асылов халық арасында киберқылмыскерлердің жаңа тәсілдері мен айлалары туралы түсіндіру жұмыстарын кеңейту, сондай-ақ қаржы ұйымдарының, байланыс операторларының және онлайн-платформалардың өздеріне заңмен жүктелген міндеттер шеңберінде клиенттері мен пайдаланушыларының құқықтарымен заңды мүдделеріне киберқатерлердің алдын алу үшін тиісті цифрлық және ұйымдастырушылық шараларды қабылдамауы немесе уақтылы қабылдамауы үшін жауапкершілігін күшейту қажеттігін атап өтті.

Сондай-ақ, Үйлестіру кеңесі мүшелерінің, киберполиция бөлімшелерінің және Қаржылық мониторинг агенттігінің интернет-алаяқтық пен қаржы пирамидаларына қарсы іс-қимылға қосқан үлесі ерекше атап өтілді.

«Заң мен тәртіп» қағидатын іске асыру шеңберінде халықтың құқықтық сауаттылығын арттыруға және киберқауіптерге қарсы тұру дағдыларын қалыптастыруға бағытталған ауқымды ақпараттық-түсіндіру жұмыстары жүргізілгені атап өтілді.

Президент Қасым-Жомарт Тоқаев Анталия дипломатиялық форумының ресми түрде ашылу рәсіміне қатысты.

Салтанатты іс-шарада Түркия Президенті Режеп Тайип Ердоған сөз сөйледі.

Сондай-ақ форум жұмысына Әзербайжан Президенті Ильхам Әлиев, Қатар Әмірі шейх Тәмим бен Хамад Әл Тәни, Пәкістан Премьер-министрі Шахбаз Шариф, Словения Президенті Наташа Пирц-Мусар, Солтүстік Македония Президенті Гордана Силяновска-Давкова, Молдова Президенті Майя Санду, Сирия Президенті Ахмед Аш-Шараа, Бурунди Президенті Эварист Ндайишимийе, Конго Демократиялық Республикасы Президенті Феликс Чисекеди, Босния және Герцеговина Төралқасының Төрағасы Денис Бечирович, Грузия Премьер-министрі Ираклий Кобахидзе және басқа да делегация басшылары қатысты.

Анталия дипломатиялық форумы – жыл сайын жоғары деңгейде өтетін халықаралық пікірталас алаңы. Іс-шара саяси көшбасшылар, дипломаттар, сарапшылар, бизнес, медиа және азаматтық қоғам өкілдерінің басын қосады. 

Сонымен қатар форум екіжақты және көпжақты байланыстарға, саяси консультациялар мен бейресми кездесулерге арналған тиімді платформа саналады.

t.me/aqorda_resmi

Қазақстан Республикасының Әділет органдары мемлекет кепілдік беретін және Қазақстан Республикасы Конституциясында белгіленген адам құқықтарын жүзеге асыру негізінде әрекет етеді.