Индер ауданының халқына «Индер су» ЖШС коммуналдық қызмет көрсетіп отыр. Кәсіпорын негізінен Индербор кентінің тұрғындарын сапалы да таза ауыз сумен жабдықтап, кәріз жүйелерінің қалыпты жұмысын қамтамасыз етуде. 

Серіктестік директоры Тельман Ерғазиевтің айтуынша, Индербор кенті бойынша су құбырларын айтпағанда, кәріздік тазарту желілерінің жалпы ұзындығы 90 шақырымға жуықтайды. Күнделікті аққан лас су жинақталатын құдықтың саны  1524-ті құрайды. 

– Ұжымға жүктелген басты міндет – тіршілік нәрі саналатын таза ауыз судың тұтынушыларға кідіріссіз жеткізіліп, кәріз желілерінің апатсыз, қалыпты жұмыс режимін сақтау. Осы мақсатта түнгі кезекшілік те ұйымдастырылып отыр. Өйткені, тәуліктің кез-келген уақытында құбырдың бойында апатты жағдайлар орын алуы ықтимал. Бұдан бөлек, су тасқыны кезінде серіктестіктің жұмысшы-қызметкерлері Жайық бойындағы ауылдарды қорғау мақсатында дамбы салып, бөгеттерді бекемдеу жұмыстарына да белсенді атсалысты. Сындарлы сәтте ерен еңбегімен ерекшеленген азаматтарымызды «Бүгінгі күннің батырлары» деп дәріптесек те артық емес. Тек ескерерлігі, тұрғындар да көрсетілген қызметті бағалап, елді мекеннің тазалығын сақтауға үлес қосқандары жөн, — дейді ұжым басшысы.

Дәулетқали АРУЕВ

Атырау газеті

Олимпиада ойындары қарсаңында Франция астанасы Парижге Қазақстаннан көлігі 5-ші Дүниежүзілік көшпенділер ойындары стилінде безендірілген спорт жанкүйері жетті. Оны қазақстандық қоғам қайраткері, саяхатшы, Астанада өтетін 5-ші Дүниежүзілік көшпенділер ойындарының Бренд-амбассары Ерік Шыныбеков тізгіндеп келді.

 Көшпенді Ерік Шыныбеков Олимпиада ойындарында қазақстандық спортшыларды қолдау мақсатында Парижге Атырау қаласынан шығып, Ресей, Грузия, Түркия, Грекия, Италия және Германия елдері арқылы жүріп өткен. Осы миссиясы аясында 5-ші Дүниежүзілік көшпенділер ойындарын насихаттап, Көшпенділер ойындарының үлгісінде көлігін безендіруді ол - өзінің отандық спортқа деген адалдығын, жанашырлығын білдіретінін айтты. Көліктің артқы есігінде дала фонында бүркітті ұшырып тұрған бүркітші бейнеленген. Дүниежүзілік көшпенділер ойындарының өткізілетін күндері мен (8-13 қыркүйек) Ойындардың ресми сайты wng.kz көрсетілген. Сондай-ақ, көліктің екі жағына Ойындардың ресми логотипінің суреті салынған.

«Менің ойымша, Еріктің ұйымдастырған акциясы оның көшпенділік болмысын бұрынғыдан да аша түседі. Сонымен қатар, 5-ші Дүниежүзілік көшпенділер ойындарын насихаттауды ұйымдастырушылар, мемлекеттік мекемелер, спорттық ұйымдар ғана емес, Қазақстанның кез келген азаматы, спорт жанкүйерлерінің де белсене кіріскенін көрсетеді.

Біз осындай жанашырларымыздың арқасында әлемдегі ең ірі спорт және мәдениет орталықтарының бірі Парижде жаһандық көшпенділер мәдениетін таныстыру мүмкіндігіне ие болғанымызға қуаныштымыз. Бұл біздің мұрамызды әлемге жариялаудың және жанкүйерлерді 5-ші Дүниежүзілік көшпенділер ойындарына шақырудың тамаша мүмкіндігі», - деді Ойындар дирекциясының маркетинг жөніндегі директоры Серік Буксиков.

Париж тұрғындары мен қонақтары көлікті сыртынан тамашалап қана қоймай, Ойындар туралы көбірек білуге ​​және көшпелі халықтардың тарихы мен дәстүрімен танысуға мүмкіндік алды.

Өз кезегінде, ДКО ұйымдастыру комитеті Париждегі Олимпиада ойындарында Қазақстан құрамасына шын жүректен сәттілік тілеп, қазақстандық спортшылардың ел намысын абыроймен қорғайтынына сенім білдіреді.

Айта кетерлігі, 8-13 қыркүйекте Астана қаласында 5-ші Дүниежүзілік көшпенділер ойындары өтеді. Іс-шараға 89 елден 2000-нан астам спортшы қатысады деп жоспарлануда. 5-ші Дүниежүзілік көшпенділер ойындарының Бас демеушісі - ALAGEUM ELECTRIC, Ойындардың Бас серіктесі - Halyk Bank. Астанада өтетін Дүниежүзілік көшпенділер ойындарында барлығы 21 спорт түрінен 97 медаль жиынтығы сарапқа салынады.

Көкпардан Қазақстан Ұлттық құрама командасы Алматы облысы, Жанашар ауылында орналасқан Олимпиадалық дайындық орталығында 5- ші дүниежүзілік көшпенділер ойындарына дайындықтарын пысықтап жатыр.

22 шілде басталған оқу-жаттығу жиыны 6 тамызға дейін созылады. Еліміздің түкпір-түкіпірінен келген 29 көкпаршының арасынан ең үздік 12 спортшы көкпар ойынына, 12-сі көкбөрү спортына іріктеліп алынады.

«Бұл оқу-жаттығу жиыны жігіттерге оңай болып жатқан жоқ. Себебі бұл жай ғана жаттығу емес, іріктеу де болып есептеледі. Еліміздің әр аймағынан келген спортшылардың арасынан 5-ші дүниежүзілік көшпенділер ойындарында ел намысын сәтті қорғау үшін ең үздіктерін таңдауға бар күшімізді саламыз», - дейді көкпардан Қазақстан ұлттық құрамасының бас бапкері Ақылбай Манкеев.

Ұлттық құрама 5-ші дүниежүзілік көшпенділер ойындары алдындағы қорытынды оқу-жаттығу жиынын Астана қаласында өткізеді.

Айта кетерлігі, 8-13 қыркүйекте Астана қаласында 5-ші Дүниежүзілік көшпенділер ойындары өтеді. Іс-шараға 89 елден 2000-нан астам спортшы қатысады деп жоспарлануда. 5-ші Дүниежүзілік көшпенділер ойындарының Бас демеушісі - ALAGEUM ELECTRIC, Ойындардың Бас серіктесі - Halyk Bank. Астанада өтетін Дүниежүзілік көшпенділер ойындарында барлығы 21 спорт түрінен 97 медаль жиынтығы сарапқа салынады.

Аймақ басшысы Серік Шәпкеновтің төрағалығымен өңірдегі санитарлық тазалық мәселесі туралы әкімдік отырысы өтті. Жиында «Таза Қазақстан» республикалық акциясы аясында жүріп жатқан жұмыстар талқыланды,-деп хабарлайды облыс әкімінің баспасөз қызметі.   

Алдымен баяндама жасаған облыстық табиғи ресурстар және табиғат пайдалануды реттеу басқармасы басшысының орынбасары Зарина Төребаева акция аясында жыл аяғына дейін 19 іс-шара жоспары бекітіліп, Атырау қаласы мен аудандарда тиісті жұмыстар жүріп жатқанын атап өтті.

  - Бүгінде алты сенбілік өткізіліп, оған 32 мыңнан астам адам қатысты. Мұнда 541 техниканың күшімен 697 тонна қоқыс полигондарға шығарылды. Өңірде төтенше жағдайларды жою бойынша жедел әрекет ету мақсатында арнайы техникалар сатып алынып, оған қосымша 1 426 дана контейнер келмек. Сондай-ақ, қаладан тыс елді мекендерді абаттандыру жұмыстары қарқынды жүріп жатыр. «Атырау қаласында 100 ауланы абаттандыру» жобасын жалғастыруға бюджеттен қаржы бөлініп, жұмыс жалғасуда, - деді З.Төребаева.

  Өңірде спорттық жаттығу алаңдарын, демалыс парктерін, балалар ойын алаңдарының құрылысы жүргізілуде.

Жиында Жылыой, Мақат, Махамбет, Индер, Қызылқоға аудандарындағы санитарлық тазалық жұмыстарының жүйесіздігіне сын айтылды. Аудан әкімдеріне бұл бағыттағы жұмыстарды күшейтуді тапсырды.

Бұдан бөлек, тұрғындарға айналаны таза ұстау туралы профилактикалық шаралар мен ақпараттық жұмыстар жүргізу керектігін айтты.

⁃ Бір ғана «Арнаулы автобаза» ЖШС мен қызметкерлердің көмегімен бүкіл қаланы тазарта алмаймыз. Тұрғындарда да жауапкершілік болуы тиіс. Бекітілген ережені орындау керек. Қоқысты демалысты күтпей, дер кезінде жинау керек. Бейнебақылау камераларын орнатып, қоғамдық тәртіпті бұзғандарға айыппұл салыңыздар. 109 біріңғай байланыс операторына түскен арыз-шағымдар мен оның орындалғаны жөнінде нақты ақпараттар керек. Қазіргі уақытта шағым көп. Бұл халықтың «Таза Қазақстан» акциясы жөнінде ақпараттанып, өз мәселелерін айта бастады деген сөз. Соларды қанағаттандыруымыз тиіс. Сол секілді телеграмм чатта да жұмысты күшейтуіміз керек. Бұл да өте маңызды мәселе. Осы жұмыстарды бірге жүйелендіріп, кемшіліктерді реттеуіміз қажет,- деді С.Шәпкенов.

Х.Досмұхамедов атындағы Атырау университетінің студенттері Парижде өтетін XXXIII жазғы Олимпиада ойындарынан кейін басталатын XVII жазғы паралимпиадаға жолдама алды.

Еліміздің абыройын әлемдік ареналарда қорғап жүрген спортшы, халықаралық дәрежедегі спорт шебері, гуманитарлық ғылымдар және өнер факультетінде оқитын Альфия Әділқызын Парижге сапары алдында университет басқарма төрағасы-ректор Саламат Идрисов қабылдап, әлемдік додада жеңіске жетуіне сәттілік тілеп,  университет ұжымы жарыста жанкүйер болатын жеткізді.  

ҚР чемпионатының жеңімпазы, әлем чемпионатының командалық белдесуінде қола жүлде, Финлиндияда өткен халықаралық турнирда күміс жүлде иеленген Альфия «Паралимпиадаға парадзюдадан 57 келі салмақта күресуге жолдама алдым. Осы уақытқа дейін Азия чемпионатында чемпион атандым. Бұл менің ең үлкен жетістігім»,- деп атап өтті. Альфияның жаттықтырушысы Жандос Қарақожаұлы да «Алфия қызымыз 2022 жылдан бастап парадзюдомен айналысып, көптеген жетістіктерге жетті. Қазіргі таңда ұлттық құрамадағы ең жас дзюдошы және болашағынан үміт күттіретін палуандардың бірі»,-деп спортшымызға сенім білдірді.

Сондай-ақ, Атырау университетінің дене шынықтыру мамандығының 2024 жылғы түлегі, халықаралық дәрежедегі спорт шебері Али Махұлбеков пара үстел теннисінен жарысқа қатысуға лицензия алды.

XVII жазғы Париж-2024 Паралимпиада ойындары 28 тамыз бен 8 қыркүйек аралығында өтеді. Олимпиада қатысушылары 23 спорт түрінен 549 медальды сарапқа салады.