Атырау облысының 54 жастағы тұрғыны Ерлан Сабиров жеті ай бойы еңбек құлдығында болғанын айтып, әлеуметтік желі қолданушыларын дүрліктірді. Ер адамның айтуынша, ол Индер ауданында мал бағып, ешқандай ақы алмаған, үнемі бақылауда болып, құлдық жағдайында өмір сүрген.

— Мен мал бақтым, бірақ ондай өмір сүргім келмеді. Алғашқы мүмкіндікті пайдаланып қашып кеттім. Жаңа өмір бастап, отбасы құрғым келеді. Маған ештеңе берген жоқ — мен жай ғана құл болдым. Содан кейін Атырауға келдім, — дейді Ерлан Сабиров.

Қазіргі таңда ол Дамбы ауылдық округінде тұрып жатыр. Жеті ай бойы жанында болған адамның есімін есіне түсіре алмайтынын айтады. Ерлан көмек алуға және ауыр жағдайдан кейін қалыпқа келуге үміттенеді.

Алайда Атырау облысы полиция департаменті бұл мәліметті жоққа шығарды. Ресми түсініктемеде:
— Әлеуметтік желіде мониторинг жасау кезінде анықталған дерекке қатысты дереу анықтау-тексеру жүргізілді. Нәтижесінде 1971 жылы туған ер адамның еш жерде мәжбүрлі түрде немесе құлдықта болмағаны анықталды. Аталған азаматтың тұрғылықты мекен-жайы бойынша туыстарымен сөйлесілді, таралған ақпараттың жалған екендігі белгілі болды, — делінген полицияның хабарламасында.

Құқық қорғау органдары тұрғындарды әлеуметтік желідегі ақпараттарды таратарда абай болуға және кез келген күмәнді жағдайға куә болса, бірден 102 нөміріне хабарлауға шақырады.

"Дендер" - Ақпарат

Ынтымақ ауылының тұрғыны, еңбекқор қолөнерші Венера Тоқтарбайқызы Ержанова өз қолымен жасаған ұлттық нақыштағы бұйымдарымен ерекшеленеді. Оның туындылары қатарында әсем тақиялар, әйелдерге арналған телпек, кеудешелер, шұлықтар, балалар киімдері, тоқыма ойыншықтар мен кәдесыйлар бар. Әсіресе әртүрлі жастағы адамдарға арналған тоқылған аяқ киімдерге деген сұраныс жоғары.

Венера Тоқтарбайқызы еңбекқорлық пен шеберлікті жастайынан бойына сіңірген. Ісмерлік өнерді анасы Жұмагүл Асановадан үйреніп, кішкентайынан тоқымаға жақын болып өскен. Шұлық, кеудеше тоқудан бастап, бүгінде аяқ киім жасауға дейін жетіліп, соңғы екі жылдан бері осы бағытта белсенді еңбек етіп келеді.

Алайда, жұмысына қажетті түрлі-түсті жіптер мен аяқ киім табандары жергілікті жерде өндірілмегендіктен, Атырау қаласынан немесе Алматыдан материалдар алдыруға мәжбүр. Бұл, әрине, өнімнің өзіндік құнын арттырады. Соған қарамастан Венера сапалы жібек жіптерді пайдаланып, өз туындыларының беріктігіне және эстетикалық тартымдылығына үлкен мән береді. Ол қолынан шыққан өнімдерін тұтынушыларына мақтанышпен ұсынады.

Бүгінде Венера ауылдастарының тапсырыстарын орындап, қолөнер бұйымдарына сұранысты қанағаттандырып отыр. Оның жасаған аяқ киімдері фабрикалық өнімдерден кем түспейді, әрі экологиялық таза, жеңіл әрі ыңғайлы. Өткен жылы ол «Бір ауыл – бір өнім» жобасы аясында Атырауда өткен іскер әйелдер көрмесіне қатысып, арнайы Алғыс хатпен марапатталды.

Қолөнерді тек хобби ретінде ғана емес, табыс көзіне де айналдыруды мақсат еткен Венераның еңбегіне отбасынан қолдау көрсетіліп келеді. Жолдасы мен енесі оның ісіне түсіністікпен қарап, демеу береді. Венера:
– Атам Әбілхайыр Ержанов ауылымызда ұста болған. Ат арба, ер-тоқым сынды ұлттық бұйымдарды жасап, елге белгілі шебер еді. Кішкентай кезімде атама қарап, «сіздің өнеріңізді жалғастырамын» деп армандайтынмын. Бүгінде ата жолын жалғастырып жүргеніме қуанамын, – дейді.

Венера мемлекеттік гранттарға қатысып, кәсібін кеңейтуді де ойлаған. Алайда әлеуметтік осал топқа жатпағандықтан, әзірге грант иелену мүмкін болмапты. Болашақта аудан орталығынан арнайы шағын цех ашып, өз ісін кеңейтуді жоспарлап отыр.

Венера Тоқтарбайқызы – Индердің келіні. Өзі Қостанай облысы, Жанкелдин ауданы Шиелі ауылында дүниеге келген. Ауылдағы Қайники Жармағанбетов атындағы орта мектепті бітіріп, Қостанай қаласындағы Ахмет Байтұрсынов атындағы колледжде және кейін осы салада жоғары оқу орнында білім алған. Дегенмен, мамандығы бойынша жұмыс істемей, өмір жолын қолөнермен байланыстырды.

Бүгінде ол Ынтымақ ауылында тұрып жатыр. Жолдасы Тимур Теңіз кенішінде вахталық қызметте жұмыс істейді, ал Венера Ә.Кекілбаев атындағы орта мектепте қоймашы болып еңбек етеді. Жас отбасының Қайсар есімді ұлы бар.

Біз де еңбекқор жұмысшы маман Венера Тоқтарбайқызына бастаған ісінің берекелі болуын, кәсіби шыңдалу жолында биік белестерді бағындыруын тілейміз.

С.Сансыбайұлы

Индер ауданы

2025 жыл елімізде «Жұмысшы мамандықтар жылы» деп жарияланды. Бұл бастаманың негізгі мақсаты – еңбек адамының мәртебесін көтеру, жастарды жұмысшы мамандықтарына қызықтыру және қоғамда адал еңбек пен табыс идеясын кеңінен насихаттау. Жұмысшы мамандықтары – экономиканың тірегі, елдің өндірістік және әлеуметтік дамуының негізі.

Осыған орай, Елтай ауылдық округі кітапханашыларының ұйымдастыруымен «Береке мен молшылықтың бастауы – еңбек» атты еңбек адамдарына арналған кездесу кеші өтті. Шараға 8 еңбек ардагері қатысып, оқушылармен өз тәжірибелерімен бөлісті. Кеш барысында әндер шырқалып, оқушылар еңбек тақырыбындағы өлеңдер оқыды. Қонақтармен сұхбат жүргізіліп, «Ата кәсіп – алтын мұра» атты көрме ұйымдастырылды. Еңбек ардагерлеріне алғыс хаттар табыс етілді.

Бұл іс-шара жастардың еңбекке деген қызығушылығын арттырып, мамандыққа деген құрметті оятуға бағытталған маңызды қадам болды.

Ақмарал БОКИРОВА

ЕЛ ІШІНДЕГІ ТАТУЛЫҚ ПЕН КЕЛІСІМДІ САҚТАУҒА ЖӘНЕ РУХАНИ МӘДЕНИЕТТІ ДАМЫТУҒА ҮЛЕС ҚОСҚАНЫ ҮШІН ЖЕРЛЕСІМІЗ ҚАПЕЗОВА МИРДАНА МАРАТҚЫЗЫ «ҚАЗАҚСТАН ХАЛҚЫ АССАМБЛЕЯСЫНА - 30 ЖЫЛ» МЕРЕКЕЛІК МЕДАЛІМЕН МАРАПАТТАЛДЫ.

Бұл марапатты Қазақстан халқы ассамблеясының облыстағы кеңейтілген кеңесінде облыс әкімі Серік Шәпкенов табыс етті. Өңір басшысы өткен 30 жыл ішінде ассамблея еліміздің қоғамдық-саяси жүйесінің ажырамас бөлігіне айналып, этносаралық келісім мен бірлікті нығайтуға өлшеусіз үлес қосып келе жатқанын атап өтті.

Сондай-ақ кеңес барысында өңірдегі бірлік пен келісімді нығайту, этносаралық қатынастарды дамыту саласындағы жетістіктер мен нәтижелер талқыланды. Айта кетейік, Мирдана Маратқызы - Х.Досмұхамедов атындағы Атырау мемлекеттік университетінің мемлекеттік және жергілікті басқару бөлімін аяқтағаннан бері ауданда мемлекеттік қызмет саласында.

Ал Атырау облысы ішкі саясат басқармасы «Қоғамдық келісім» коммуналдық мемлекеттік мекемесі құрылғаннан бері Индер ауданы бойынша сарапшы қызметін жемісті атқарып келеді.

С.САНСЫЗБАЙҰЛЫ

28 сәуір күні "1 Мамыр — Қазақстан халықтарының бірлігі" күні қарсаңында балалардың қатысуымен ашық сабақтар мен түсінік жұмыстары өткізілді.

Күнделікті сабақ аясында балалар дефектологтің, логопедтің, психологтың түзету-дамыту жұмыстарына, емдік дене шынықтыру (ЛФК) жаттығуларына және еңбек сабақтарына белсене қатысты. Әлеуметтік жұмыс жөніндегі  маман мен тәрбиешілер ұлттар достығы, бірлік пен ынтымақтың маңыздылығы туралы түсінік жұмыстарын жүргізді.

Іс-шара балалардың таным көкжиегін кеңейтіп, достық пен сыйластық сезімін нығайтуға ықпал етті.

Мекеме атынан барша Қазақстан халқын 1 Мамыр — Қазақстан халықтарының бірлігі күнімен құттықтаймыз! Бірлігіміз артып, елімізде тыныштық, татулық пен бейбітшілік орнасын!

Жөкен Айнагүл 

,,Жартылай күндізгі стационарлық үлгідегі ұйымының 

күндіз болу бөлімшесі" КММ-сі директоры