Атырау қаласында Құлсарыдан келген балаларға арналған ақпараттық технологиялар бағытына негізделген жазғы білім беру лагері ұйымдастырылды.
Жоба «Теңізшевройл» компаниясының Қоғамдық инвестициялар бағдарламасы (ҚИБ) аясында жүзеге асырылуда. Бастаманың кураторы — ҚИБ-2025 серіктестерінің бірі саналатын «Shyraq Education» компаниясы.
Бүгінгі таңда лагерьде 17 оқушы демалып үлгерді. Олардың басым бөлігі — көпбалалы және табыс деңгейі орташа отбасылардан шыққан балалар.
Лагерь қатысушылары үшін барлық қажетті жағдайлар жасалған: қауіпсіз инфрақұрылым, ойын, оқу және демалыс аймақтары жабдықталған. Балалар демалып қана қоймай, цифрлық технологиялар саласында пайдалы білім алуда. Оларға Figma платформасында жұмыс істеудің негіздері мен frontend-бағдарламалауға кіріспе үйретілуде.
«Біздің мақсатымыз — балаларға жай ғана жазғы демалыс емес, сонымен қатар олардың көкжиегін кеңейтіп, заманауи цифрлық дағдыларды үйренуге мүмкіндік беру, әрі IT саласын болашақ кәсібі ретінде көруге ынталандыру. Олар сабақтарға үлкен қызығушылықпен қатысуда, бұл бізді шабыттандырады», — деп атап өтті «Shyraq Education» лагерь ұйымдастырушылары.
Айта кетейік, лагерьдің алғашқы ауысымы аяқталды, алда әлі бірнеше топтың келуі жоспарланған. Жалпы алғанда, 50–55 баланы қамту көзделіп отыр.
