Қараша айы келсе де күннің сәл ашықтығын пайдаланған пішеншілер шабындыққа барынша шалғы сермеуде.
Жалпы биылғы қуаңшылық малшыларға қатты әсер етіп, шөп тым сирек шыққан. Оның үстіне өткен жылы біраз жер өртеніп те кетті. Жаңбыр болмаған соң оның бірер жылда қалыңдыққа айналуы да екі талай. Дегенмен, «Ақниет», «Кенже» шаруа қожалықтары бірігіп, «Масат» пен «Шұбалаң» жайлауы аралығындағы тегістікке шалғы салып, мал азығын дайындауда. Ақтық пен шағыр, жусан аралас алқап сұйық болса да өзге шабындық жоқ. Сондықтан әуелден еңбекке машықтанған бұрынғы «Амангелді» кеңшарының қызметкерлері Нағиым Каукенов пен Сандыбай Қаражанов техникаларын күтіп, ұстап сынғанын сол далада жөндеп алып, өнікті еңбектің үлгісін көрсетуде.
-Шабындық жоқтың қасы. Бір айналымның өзінде түскені көңіл көншітпейді. Барымызша жинап, рулондап жатырмыз. Салқын түскенше шауып, одан соң қыстақ басына тасылады,-дейді Н.Каукенов.
Ж.ІСІМ.
Елтай ауылы.
