Индер ауданында сайлау ұйымшылдықпен басталды. Алғашқы боп келген кент тұрғындары көңілді, өз қалауларын білдіріп, таңдауларын жасап дауыс беріп жатыр. Саяси науқанға Құспановтар отбасы отбасымен келіп бұл сайлаудан үлкен үміт күтетіндерін айтады.
– Бүгін міне әдеттегідей ертемен тұрып, учаскеге келіп, отбасымызбен дауысымызды бердік. Бұл барлық қазақстандықтардың азаматтық борышы деп білемін. Әрине, осыған дейінгі өткен сайлауға қатысып келеміз. Десек те бұл жолғы сайлау ерекше. Бір ай көлемінде барлық үміткерлер ел-қырды аралап, үгіт-насихаттарын жүргізді. Оны теледидар мен әлеуметтік желілер арқылы көріп, біліп отырмыз. Сондықтан, айтылған сөздер мен алға қойған мақсаттар іске асып, өз нәтижесін береріне сенемін. Бастысы, еліміз аман болып, ел іргесі биік болсын деп тілейміз, - дейді олар.