Есбол ауылдық округінде ауданы 6353,83 шаршы метр болатын жалпы орта білім беретін 320 орындық мектептің құрылысы басталды.
Қазіргі таңда жер қазу жұмыстары жүргізіліп, іргетас құюға орын жасалуда.
Мердігер мекеме - «Оңдасын Строй» ЖШС-і, жобаның авторы –«СтройДизайнСервис» ЖШС-і.
Екі қатарлы ғимаратта - оқу сыныптары, асхана, кітапхана, медициналық пункт, спортзал, акт залы, мұғалімдер бөлмесі, өндірістік шеберханалар, демалыс орындары және киім ілетін орын қарастырылған. Бұдан бөлек, оқу бағдарламасына қажетті барлық жабдықпен қамтылатын болады.
Қ. Есқалиев атындағы орта мектептің директоры Қанатов Руслан Бағытұлының айтуынша, бұған дейін Есбол ауылының балалары 1937 жылы салынған апатты жағдайдағы Қ.Есқалиев орта мектебінде оқып келген.
Алайда ескі білім ғимаратындағы оқу кабинеттерінің сыйымдылығы мұндағы 245 оқушының санына сәйкес келмейді. Бұл тиісінше, оқушылардың сапалы білім алуына кедергі келтіруде.
Аталған жаңа мектептің құрылысы аяқталып, тапсырылғаннан кейін оқушылардың 2 ауысымда жоғары деңгейде білім алуына мүмкіндік береді.
Индер ауданы әкімдігінің баспасөз қызметі
