Орталық саябақта «Aspan Cinema» отандық мотивациялық фильмдерді ашық аспан астында көрсету өткізілді.
Аталған ісшараның мақсаты - жастардың бос уақытын тиімді пайдалану, жастармен тығыз қарым-қатынаста болуға бағытталған. Көрсетілім барысында отандық «Боксшы» фильмі аудан жастарының назарына ұсынылды.
Фильмнің режиссері Ақан Сатаев. Фильм сценарийі бойынша атақты боксшы болуды армандайтын Серік Сапиевтің спортшы болу жолы туралы баяндалады. Бүкіл әлем оның талантын білетініне сенген кейіпкер күн сайын жаттығады. Бір күні ол көптен күткен Олимпиада ойындарына шақырылады. Сол үшін ол жаттығуды үзбестен, өзінің еңбегінің арқасында еліне алтын медаль сыйлайтынына сенімді болады. Алайда, өмірдің өзіндік тосын сыйлары дайын еді. Боксшы жеңіліске ұшырағаннан кейін барлығы өзгерді. Бұл сынға да берілмей, көптеген тағдырлы оқиғаларды бастан өткізіп, бойындағы қорқынышты жеңіп, жаттықтырушымен бірге жаттығуға кіріседі. Осылайша, өзінің нағыз боксшы ретінде келесі Олимпиадада алтын алуды көздейді.
Фильм өзіне мақсат қойған жас жігіт Серік Сапиев шынымен чемпион бола ала ма деген сұрақтың жауабын көрсетеді. Ашық аспан астындағы фильмді жас өрендер мен жасөспірімдер, отбасылы жандар да көруге жиналып, осындай алдымызға мақсат қойып, нәтижеге жетпей берілмеуді көздейтін мотивациялық фильмді көруге мүмкіндік жасағандарыңызға ризамыз деп ұйымдастырушыларға алғысын білдіріп жатты.
Ж.НАРИМАНОВА
