Қоңыр күздің алғашқы күндерінің бірінде қызыл жалынға оранған Қостанай облысы Әулиекөл ауданындағы зардап шеккен ағайынға Дендер жұрты да қол ұшын созып қолдау көрсетті. Аудандық жастар ресурстық орталығы ұйтқы болған игілікті іске ортақтасып қолда барымен бөлісті. Орталықтағы «Әйіп қажы» мешітінің алдына қойылған «Газель» автокөлігіне гуманитарлық көмек лезде толтырылды.
-Аудандық ішкі саясат бөлімі және жастар ресурстық орталығының ұйымдастыруымен Қостанай жеріндегі замандастарымызға жедел көмек беруді қолға алып отырмыз. Біздің бастамамызға аудан халқы мен еріктілері, мекемелер мен бөлімдері, «Талап» базарының кәсіпкерлері мен қоғамдық ұйымдар өз үлестерін қосты. Сол үшін де жерлестерімізге алғыс білдіргіміз келеді. Мұндай қиыншылық енді қайталанбауын тілейміз,-дейді орталық жетекшісі Бекқайыр Есениязов.
Арнайы ашылған есепшотқа жекелеген тұрғындармен қатар аудандық «Дендер» газетінің журналистері мен қызметкерлері бір күндік жалақыларын аударды. Ағайынның аманаты болып табылатын 4 тонна жүкті тиеген көлік межелі жерге жеткен көрінеді.
С.ЕРСАЙЫНҰЛЫ
