Мереке қарсаңында Индер ауданына қарасты Өрлік ауылдық округінде "Өрлік" жаңа наубайханасы іске қосылды. Жалпы аумағы 120 шаршы метрді құрайтын наубайхана 5 адамды тұрақты жұмыспен қамтып отыр.
"Ауыл шаруашылығын қаржылай қолдау қоры" мемлекеттік бағдарламасы аясында кәсібін дамытқан нысанның салтанатты ашылуы өткізілді. Салтанатты шараға ауыл әкімі, аудандық кәсіпкерлік, өнеркәсіп және туризм бөлімінің басшысы Дулатбай Сариев, «Атамекен» ҰКП Индер аудандық филиалы қызметкерлері мен ауыл тұрғындары қатысты.
Ауыл әкімі Серік Сисатов нысанның ашылуымен құттықтап, ауылдағы кәсіпкерлік саласының қарқын алып келе жатқанын жеткізді. Сонымен қатар, осы уақытқа дейін қаладан, аудан орталығынан тасымалдау кейде қиындықтар туғызатын, міне бүгін өз наубайханамыз ел игілігіне жұмыс жасайды деп ризашылығын білдірді.
«BekSal» Жеке кәсіпкерлігінің директоры Бибігүл Шахманованың айтуынша, бүгіннен жұмысын бастаған наубайхана тәулігіне 108 нан мен кондитерлік өнім түрлерін дайындауда.
Жадыра НАРИМАНҚЫЗЫ
