Норовирустық инфекцияның алдын алу
Норовирустық инфекция – жіті ішек инфекциясы. Қоздырғышы ішек вирустары түрінің бірі – норовирус болып табылады. Вирустар науқас адаммен тікелей қарым-қатынаста болған кезде, нәжіс-ауыз арқылы ауру жұқтырған тамақ не сумен, кейде ауа-тамшы жолымен беріледі. Көбіне норовирустық инфекцияны ішек немесе асқазан тұмауы деп атайды.
Аурудан айыққан адамдарда әлсіз иммунитет қалыптасады және аз уақытқа созылады. Өте сирек жағдайларда ауру өлімге алып келеді – бұл организмнің ауыр сусыздануынан болады.
Инкубациялық кезең 10 – 72 сағатты құрайды, көп жағдайларда симптомдар 1 -2 тәуліктен кейін көрінеді. Бұл өзімен өзі кететін ауру, оның негізгі белгілері – жүрек айну, құсу, іш өту, сондай-ақ іштің айналасында ауырсыну, кейбір жағдайларда дәмді сезіну жоғалады. Балаларда әдетте симптоматикада құсу, ересектерде - диарея басым болады. Ұйқышылдық, әлсіздік, бұлшықеттің ауыруы және әлсіз қызбаның болуы байқалуы мүмкін. Қауіп-қатер тобына балалар, қарт адамдар және имундық жүйесі әлсіз пациенттер кіреді.
Бүгінгі күні норовирусқа қарсы арнайы вакцина әзірленген жоқ. Сондықтан профилактикалық іс-шаралар жалпы сипатта болады және мынадай шараларды қамтиды:
- жеке бас гигиенасын сақтау;
- салауатты және белсенді өмір салтын жүргізу, тек тазартылған немесе қайнаған суды пайдалану;
- жемістер мен көкөністерді тамаққа пайдалану алдында мүмкіндігінше ағынды сумен мұқият жуу;
- тамақтану алдында қолды сабынмен жуу, қолға арналған антисептиктерді (санитайзерлерді) пайдалану;
- науқас адаммен қарым-қатынасты шектеу, сондай-ақ оның заттары мен киімдерін ұстамау.
Бекешева Алия Аюпқалиқызы
Атырау облысының санитариялық-эпидемиологиялық бақылау департаментінің басшысы
