Биылғы Жұмысшы мамандықтар жылы – біздің еңбегіміздің қоғамдағы маңызын айқын көрсеткен ерекше кезең болды. Мал дәрігері ретінде мен бұл жылды тек мерейлі сәт емес, сонымен бірге жауапкершілік жүгін терең сезінетін мүмкіндік деп қабылдаймын. Өйткені біздің жұмыс – ауылдың тыныштығы мен елдің азық-түлік қауіпсіздігінің негізі.
Малдың саулығы – халықтың денсаулығы. Қандай ауа райы болсын, қысы-жазы ауыл аралап, әрбір қожалықтағы жағдайды бақылап, алдын алу шараларын жүргізу – біздің күнделікті міндетіміз. Кейде түн ортасында шақыртып, өмір мен өлімнің арасындағы жануарды аман алып қалуға тура келеді. Ол – жай ғана қызмет емес, жүрек қоя білуді, шыдам мен шынайы ықыласты талап ететін мамандық.
Жұмысшы мамандықтары – ел экономикасының тірегі. Мал дәрігері, механизатор, құрылысшы, дәнекерлеуші, шопан секілді мамандық иелері көзге көп көрінбей жұмыс істегенімен, олардың еңбегісіз ауыл да, қала да, жалпы мемлекет те алға баса алмайды. Осы жыл шынайы еңбектің қадірін қайтадан көрсетіп, жас ұрпаққа жұмысшы кәсіпке құрметті күшейте түсті деп ойлаймын.
Қазіргі таңда ветеринария саласы да жаңа технологиялармен дамып келеді. Бұл бізден үнемі ізденісті, білімді жетілдіруді, жаңа тәсілдерді меңгеруді талап етеді. Жұмысшы мамандықтар жылы аясында біздің салаға да ерекше көңіл бөлініп, жаңа құрал-жабдықтар, оқыту мүмкіндіктері мен жағдайлар жақсарса – бұл тек мал дәрігерлеріне ғана емес, тұтас ауыл шаруашылығына серпін берері сөзсіз.
Сондықтан осы жылды біз үшін еңбектің қадірін арттырған, мамандықтың мәртебесін өсірген, ауыл еңбеккерлерінің еңбегін тануға бағытталған маңызды қадам деп бағалаймын. Алдағы уақытта да мал саулығын қамтамасыз етіп, елдің амандығына үлес қоса береміз.
М.ЖАҒЫПАРОВ
мал дәрігері
