Индербор кентінің ішінде бұрыннан қалған бірнеше ірілі, ұсақты карьер, жыралар бар. Соның ішінде небір түрлі қоқыспен бітеліп келе жатқаны Махамбет пен Ақтау көшелерінің аралығындағы ескі карьер екендігі жасырын емес.
Оған тек құрылыс қалдықтары, малдың қиы төгілсе бір сәрі ғой. Шұңқыр ішінде автокөліктердің майынан босаған ыдыстары, покрышкалары, баклашка сынды пластикалық қалдықтар да жайрап жатыр. Оның қоршаған ортаға қаншалықты зиян екендігін бағамдай беріңіз. Әсіресе қазіргідей көктем мезгілінде оны қоқыстарды әлдебіреулер өртеп, одан шыққан қара түтін, бықсыған иіс маңындағы тұрғындарды әбігерге салып отырғанын талай жазғанбыз.
Ал жақында үлкен көлемде гипскартонның қалдықтарының төгілгеніне куә болдық. Гипс қалдықтары таудай болып, қабат-қабатымен жайрап жатыр. Арнайы жүк көліктерімен төгіп, оны трактормен қырғаны да көзге көрініп тұр. Бұл өндірістік қалдықтардың құрамындағы зиянды қалдықтар қоршаған ортаға қаншама қауіп қатерін туғызуда.
Осы орайда аудандық тұрғын үй-коммуналдық шаруашылық, жолаушылар көлігі және автомобиль жолдары бөлімінің басшысы Асхат Аймұратовқа хабарласқанымызда, күнделікті тұрмыстық қылдықтардың өзі арнайы белгіленген полигонға болмаса бұл жерге қоқыс төгуге рұқсаттың берілмегендігін айтты.
Ал Индербор кентінің әкімі Шалқар Алмурзиев төгілген өндірістік қалдық бойынша зерделеу жұмыстары жүретіндігін қаперге берді.
