Аудандық балалар кітапханасында қазақтың ақиық ақыны Мұқағали Мақатаевтың туғанына 90 жыл толуына орай "Хан Тәңірдегі асқақ тұлға" атты әдеби кеш болып өтті.
Ақынның өмірбаяны мен өлеңдерінен сыр шертілген кеште интерактивті тақтадан ақын туралы слайдтар мен бейнероликтер көрсетілді.
Әдебиет саласында 25 жылдай қалам тербеген Мұқағали ақынның 1000-нан аса өлеңі болса, шараға қатысқан Көктем, М.Әуезов орта мектептерінен келген оқушылар "Сәби болғым келеді", "Өмір жайлы", "Ақынға", "Үш бақытым", "Туған күн", т.б. сынды бірқатар өлеңдерін жатқа айтты. Орал қаласында білім алып жүрген 1 курс студенттері Ақтілек Әлібекұлы мен Баубек Жұмаш та ақынның өлеңдерін нақышына келтіріп айтып берді.
Ал ақынның өмір жолдарына, шығармаларына арналған "Мұқағали" сөзжұмбағын шешуде оқушылар тапқырлық танытты.
Шара соңында аудандық балалар кітапханасының меңгерушісі Болған Әмірғалиқызы шараға қатысқан оқушыларға өз алғыстарын айтып, сыйлық табыстады.
А. Тұрғалиұлы
