Ақтөбе облысында кеше, 28 тамыз күні Қарғалы су қоймасы аумағында «QargalyFest» музыкалық фестивалі және «Qazaqman» триатлоны жарысының алғашқы күні өтті. Фестивальге қала тұрғындары, шақырулы қонақтар, өңірлік және эстрада жұлдыздары және Ақтөбе облысының әкімі Оңдасын Оразалин қатысты. Шара барысында өңір басшысы фестиваль жұмысымен танысып, облысымыздағы туризмді дамыту мақсатымен қолға алынған жобаға сәттілік тіледі. Аталмыш іс-шараны облыс тұрғындары арасында ішкі және оқиғалық туризмді дәріптеу мақсатында «VisіtAktobe» туристік ақпараттық орталығы ұйымдастырды.

Фестиваль аясында өткен «QAZAQMAN» триатлоннан жарыста Қазақстанның түрлі қалаларынан 140-тан астам мықты спортшылар, оның ішінде кәсіби триатлеттер де қатысты. Қатысушылар 2,5 км. жүзу, 50 км. веложарыс және 13 км. жүгіруден командалық және жеке сынақтан өтті.

Ішкі туризімді дамытуға және облыс тұрғындарына мерекелік көңіл – күй сыйлау мақсатында өтетін екі күндік фестиваль аясында қолөнершілер мен қолөнер шеберлерінің көрме-жәрмеңкелері, спорттық шеберлік сыныптар, түрлі жәрмеңкелер, балалар алаңы, фудкорттар мен концерттік бағдарламалар ұйымдастырылады. Кеш соңында өтетін концерттік бағдарламаға Qanay, «Орда» тобы, Kali, Maqlao, Ka-Re және Abdr сияқты жұлдыздар қатысады. Фестиваль мерекелік отшашумен аяқталады.