Жергілікті атқарушы органдардағы мемлекеттік қызметшілердің мемлекеттік қызмет саласынан кету деректері 2019 жылмен салыстырғанда 56%-ға азайды.
Бұл туралы Қазақстан Республикасы Мемлекеттік қызмет істері агенттігінің Атырау облысы бойынша департаментінің басшысы Ерлан Ермаханбетов өңірлік коммуникациялар қызметінде өткізілген брифинг барысында мәлімдеді.
Жалпы, облыста 256 мемлекеттік органда 2788 мемлекеттік қызметші еңбек етсе, олардың 1445-і жергілікті атқарушы органдарда қызмет атқаруда.
Бұл ретте, жергілікті атқарушы органдардағы қызметшілердің сапалық құрамы бойынша 94,5%-ы жоғары білімді азаматтар (жоғары білімділер – 1366, орта кәсіптік білімі барлар – 79). Олардың қатарында «Болашақ» халықаралық стипендиясы мен ҚР Президенті жанындағы Мемлекеттік басқару академиясының 17 түлегі бар.
Есептік ақпараттарға сүйенсек, 2022 жылы Академияға 10 мемлекеттік қызметші оқуға қабылданып, 20%-ға артқан (2022ж.-10, 2021ж.-8).
Атап өту қажет, облысымызда 61,8%-ы – әйелдер (1723), 38,2%-ы ер азаматтар (1065) болып табылады, олардың ішінде жастардың үлесі – 16,3% құрайды.
