«Таза Қазақстан» экологиялық акциясы аясында Индер ауданында бірқатар жұмыстар жүргізіліп келеді.
Мәселен, Индербор кентінің орталық 7 көшесіне жол қозғалысын бөлу, бағыттау және тоқтау жолақтары және 26 жерге жаяу жүргіншілер өткелі жаңартылып сызылып, көшедегі кептеліс пен апаттық жағдайлардың туындау қаупін азайту мақсатында жол белгілері мен таңбалардың жаңартылып, саябақтар мен жарнама тақталары сырланып, кенттің келбетіне әсер етіп тұрған сүреңсіз ескі нысандар иелерінің келісімімен бұзылуда.
Сонымен қатар, аудан орталығындағы көпқабатты 4 үйдің қабырғасына әлеуметтік маңыздағы суреттер (мурал) салынды. Салынған суреттер мақсаты бала тәрбиесі мен салт-дәстүрді насихаттауға және халықты табиғатты аялауға бағытталған. Құны 9 млн 625 мың теңгені құрайтын жұмыстарды «Талант» ЖШС мердігер мекемесі мемлекеттік сатып алу порталы арқылы жеңімпаз болып танылып, іске асырды. Атап өтсек, Индер көпбейінді ауылшаруашылық колледжінің қабырғасына – «Жұмысшы жастар», Бейбарыс, 4 үйдің қабырғасына – «Таза Қазақстан», Махамбет, 43 б үйдің қабырғасына – «Ана мен бала», Тайсойған, 9 үйдің қабырғасына – «Әйел ана» суреттері салынды. Оған қоса, жергілікті қолөнер шебері Азамат Кенжеғалиевтің «Алтын балық» кіші архитектуралық композициясы жеке кәсіпкер Арман Төлегеновтың демеушілігімен «Арбат» бойына орнатылды.
Ж.НАРИМАНҚЫЗЫ
