Елімізде кәсіпкерлікті қолдауға бағытталған бастамалардың бірі - «Бизнестің жол картасы – 2025» бағдарламасы. Аудандық кәсіпкерлік және туризм бөлімінің басшысы Дулатбай Сариевтің айтуынша, аталған бағдарламада бұрын-соңды жергілікті жерлерде жүзеге асырылмаған жобаларға қаржылай гранттар бөлінуде.

Оған қол жеткізгендердің бірі, жергілікті жас кәсіпкер Серік Ерболатов инновациялық жобалар негізінде мемлекеттен қайтарымсыз 2 млн теңге грант алып, таяуда аудан орталығындағы «Ақсай» қонақ үйінің аумағынан жаңадан кір жуу цехын ашты.

- Кәсіпкерлікті қолдауға мемлекет бөлген бұл қаражатқа кәсіпкер шағын және үлкен кір жуу аппаратын, жуылған заттарды өтектеу құрылғыларын сатып алып, іске кірісті. Кәсіпкер қосымша екі адамды жұмысқа алып отыр, - деді бөлім басшысы Д.Сариев.

Жеке кәсіпкер Серік Ерболатовтың айтуынша, қонақ үй қызметінде бұрыннан төсек-орындарды жуу қызметі атқарылады. Енді мектептер мен бөбекжайлардан, жеке тұрғындардан тапсырыс қабылдап, кір жуу көлемін ұлғайтпақ.

-Алдағы уақытта кәсібімізді ұлғайтып, киімдерді химиялық тазарту цехын ашуды жоспарлап отырмыз, - деді жеке кәсіпкер.

Ендеше, кәсіпкердің тың бастамасына сәттілік тілейміз.

С.САНСЫЗБАЙҰЛЫ