Ата-бабаламыздан мирас болып қалған күй өнерін жандандыруда Ұлттық домбыра күнінің алар орны ерекше. Алпыс екі тамырды идіріп, ет жүректі елжіреткен қоңыр домбыраның киелі үні кез келген жан баласын таңғалдырмай қоймасы анық.

Аталған мерекеге орай, «Жас өркен» жазғы демалыс лагерьіндегі тәрбиешілер Г.Сариева, Е.Орынбасаров, А.Өтениязова мереке қарсаңында «Домбыра дастан» тақырыбында лагерь демалушыларына домбыра туралы кең мағлұмат беріп, домбыра аспабын үйретіп, сол арқылы ұлттық болмыс, қазаққа тән қасиеттерді түсіндірді. Негізінде домбыра аспабын меңгеру арқылы әрбір адамның ойлау қабілеті артып, білім алуға құштарлығы оянады, мәдени ой-өрісі жоғарылай түседі. Айталық, лагерь аумағында мерекеге орай күмбірлетіп күй жіберіліп, оны әрбір бала құлақтарын түріп, мән-мағынасын үғынып, зор ризашылықпен тыңдады.

Сондай-ақ бұл күні қылқалам шеберлерінің де байқауы ұйымдастырылып, жеңімпаздар марапатталды. Лагерь меңгерушісі Н.Қарақұловтың айтуынша, мерекеге орай өтіп жатқан игілікті шаралар Тәуелсіздіктің 30 жылдық мерекесі қарсаңында өсіп келе жатқан жасұрпақтың бойына ұлттық рухты сіңдіру. Бүгін де лагерьдің екінші кезеңін 79 бала аяқтады.

Диас АЙБАР