Бүгін ұстаз әрі білікті бапкер, үздік ойыншы, үздік қақпашы, Атырау қаласының “Каспий” құрама командасы мен “Атырау ардагерлер” командасының мүшесі болған Қалиев Сабыржан Қазанқапұлын еске алуға арналған ардагерлер арасындағы кіші аяқ добынан турнир ұйымдастырылды.
4 команда қатысқан жарыс “Санжар” футбол алаңында өтті.
“Сабыржан Қазанқапұлы-оқушыларға алғашқы әскери дайындық және дене шынықтыру сабақтарынан дәріс берген ұстаз. Бір жыл бұрын дүниеден озды. Бір топ құрдастары ағама арнап футбол жарысын өткізгісі келді әрі өзі ойнаған команда мүшелері да бар. Өз кезегімізде турнирді ұйымдастырып, бүгінге ашылу салтанатын жасап жатырмыз”, деді інісі Жеңіс Қазанғапов.
Сондай-ақ туыстары, шәкірттері республикалық әскери патриоттық ойындарынан топ жарған Сабыржан Қазанқапұлын еске алуға арналған жарыстар өткізіліп тұратынын жеткізді.
Жарыс қорытындысы бойынша “Каспий жастары” 1-орын, “Милеротор” командасы 2-орын иеленді. Ал Сабыржан Қазанқапұлының құрдастарынан құралған командаға 3-орын бұйырды.
Турнир жеңімпаздарына кубок табысталып, арнайы дипломмен марапаттады.
