Қазіргі заманда технология дамып, цифрландыру алдыңғы қатарға шыққанымен, кез келген елдің әлеуметтік-экономикалық дамуы ең алдымен жұмысшы мамандық иелерінің еңбегіне тікелей байланысты. Осы тұрғыдан алғанда «Жұмысшы мамандықтар жылы» – уақыт талабынан туған, қоғам үшін аса маңызды бастама. Бұл жыл еңбек адамының мәртебесін көтеруге, жастардың жұмысшы кәсіптерге деген көзқарасын өзгертуге және білікті мамандар даярлауға бағытталған.
Жұмысшы мамандықтарға дәнекерлеуші, электрик, құрылысшы, механик, слесарь, жүргізуші, аспаз, тігінші, ауыл шаруашылығы мамандары сияқты кәсіптер жатады. Бұл мамандық иелері күнделікті өміріміздің үздіксіз жұмыс істеуін қамтамасыз етеді. Үйлер салынып, жолдар жөнделіп, зауыттар жұмыс істеп, егін егіліп, өндіріс дамуы – бәрі де осы еңбек адамдарының маңдай терінің нәтижесі. Сондықтан жұмысшы мамандықтарын төмен бағалау немесе «беделі төмен кәсіп» деп қарау – үлкен қателік.
«Жұмысшы мамандықтар жылының» басты мақсаты – еңбек адамына деген құрметті арттыру, адал еңбек арқылы табысқа жетуге болатынын көрсету. Бұл жыл аясында кәсіби-техникалық білім беру ұйымдарының рөлі күшейіп, колледждерде заманауи құрал-жабдықтармен жұмыс істеу мүмкіндігі артады. Сонымен қатар, жастарға арналған кәсіби бағдар беру шаралары, шеберлік сабақтары мен өндірістік тәжірибелер олардың болашақ мамандығын саналы түрде таңдауына жол ашады.
Бүгінгі таңда нарықта жоғары білімді мамандардан гөрі білікті жұмысшы кадрларға сұраныс артып келеді. Көптеген жұмысшы мамандықтар тұрақты табысқа, әлеуметтік кепілдіктерге және мансаптық өсу мүмкіндігіне ие. Ең бастысы – бұл кәсіптер нақты нәтиже мен қоғамға пайдалы еңбекке негізделген. Өз ісінің шебері болған жұмысшы әрдайым сұраныста болады және ел дамуына нақты үлес қосады.
«Жұмысшы мамандықтар жылы» – тек бір жылдық науқан емес, қоғамдағы еңбек мәдениетін қалыптастыруға бағытталған маңызды қадам. Еңбек адамына құрмет көрсету, жұмысшы мамандықтарды дәріптеу – болашақтың берік іргетасы. Жастар адал еңбек пен кәсіби шеберлікті таңдаса, еліміздің экономикасы нығайып, қоғам тұрақты дамуға қол жеткізеді.
Әсел ҒҰБАШОВА,
жас кәсіпкер
