Халықаралық дәрежедегі спорт шебері Болат Теміровті еске алуға арналған бокстан ІІ халықаралық турнир басталды, деп хабарлайды AtyrauPress тілшісі.
Х.Досмұхамедов атындағы Атырау университетінде КСРО-ның бес дүркін жеңімпазы, Халықаралық дәрежедегі спорт шебері, Атырау облысының Құрметті азаматы Теміров Болат Бисенұлын еске алуға арналған бокстан ерлер арасындағы ІІ халықаралық турнирдің ашылу салтанаты өтті.
Болат Бисенұлы Теміров – КСРО-ның 5 дүркін, Қазақстанның 7 дүркін чемпионы, көптеген халықаралық турнирлердің жеңімпазы мен жүлдегері. 1987 жылы КСРО спорт шебері атанса, 1991 жылы Халықаралық дәрежедегі КСРО спорт шебері, 1997 жылы ҚР Еңбек сіңірген спорт шебері атақтарына ие болған тұлға. 1988-1992 жылдары Х.Досмұхамедов атындағы Атырау университетінің дене шынықтыру және спорт мамандығында оқып, дене шынықтыру пәні мұғалімі біліктілігін алған.
Атырау облысы дене шынықтыру, спорт және туризм басқармасы мен Атырау Бокс федерациясының ұйымдастыруымен өткен салтанатты шараға бокстан халықаралық спорт шебері, Олимпиада ойындарының чемпионы, Азия ойындарының чемпионы Бақыт Сәрсекбаев, Атырау облысы әкімінің орынбасары Дарын Шамұратов, Атырау дене шынықтыру, спорт және туризм басқармасы мен Атырау Бокс федерациясының өкілдері, Болат Теміровтың отбасы, педагогика ғылымдарының докторы, профессор Асхат Иманғалиев, Атырау университетінің Басқарма төрағасы-ректор Саламат Идрисов қатысты.
Шараның алғы сөзінде «Кеңестер Одағының бес дүркін жеңімпазы, Халықаралық дәрежедегі спорт шебері, Атырау облысының Құрметті азаматы Теміров Болат Бисенұлын еске алуға арналған бокстан ерлер арасындағы ІІ халықаралық турнирдің ашылуымен Атырау облысы әкімі Серік Шәпкенов атынан шын жүректен құттықтаймын! Спорт десе делебесі қозбайтын жанкүйерлер кемде-кем. Соның ішінде бокс спортының орны ерекше. Бокс спортының деңгейін одан әрі көтеру және осы аталған спорт түрінің биікке көтерілуіне үлес қосқан Болат Бисенұлын мәңгілік қалдыру мақсатында ұйымдастырылып отырған шараның жас спортшылардың шыңдалуына үлесі зор деп есептеймін. Жарысқа қатысушыларға сәттілік тілейміз, шын мықты жеңіске жетсін!»,- деді Атырау облысы әкімінің орынбасары Дарын Шамұратов.
Аталған халықаралық турнирге Алматы, Ақмола, Ақтөбе, Атырау , Батыс Қазақстан, Жамбыл, Жетісу, Қарағанды, Қостанай, Қызылорда, Маңғыстау, Павлодар, Түркістан облыстарының, Астана және Шымкент қалаларының, сондай-ақ Өзбекстан, Қырғызстан мемлекеттерінің бокс құрамаларынан 200-ге жуық спортшы бақ сынауға келген.
