Ауданда көктем шыға басталатын тазалық айлығы жарияланып, жасалар шаруалар тізбегі бекітілді. Яғни, апта сайын сенбіліктер ұйымдастырылып, тағы бір мәрте тазалыққа мән беру көзделіп отыр.

Ал кешегі сенбілікте кент басындағы мекемелер өз аумақтарын тазаласа, бірқатар мекемелерге арнайы орындар бекітіліп берілді. Әсіресе Махамбет көшесінен төмен қарай түсетін жолдағы арықтар да күл-қоқысқа толып қалғаны байқалды. Ол жерден шығарылған қоқыстарды тазалыққа жауапты «Жасыл-Аймақ» серіктестігі бөлген техникалар арнайы қоқыс алаңдарына алып кетіп жатты.

«Көктем», Ш.Уәлиханов, М.Әуезов, С.Сейфуллин орта мектептері, аурухана ұжымы қызметкерлері аулаларын сыпырса, енді бірде өткен жылдары отырғызылған көшеттердің түбін қопсытып жүрді.

Сенбіліктің жүру барысын өз көзімен көрген аудан әкімінің орынбасары Ақтілек Мусағали сенбіліктің ойдағыдай жүріп жатқанын екпін түсіре атап өтті.

-Сенбілікте әр адам өз қалауымен шығу арқылы қоршаған ортаның тазалығына ерекше мән беріп жатады. Осындай үрдіс негізінде ұйымдастырылып отырған шараға белсенділікпен қатысып отырған мекемелер мен ұжым қызметкелеріне аудан басшылығы атынан ризашылық білдіреміз. Жоспар бойынша осы жолы әрбір мекемеге өз аумақтарын тазалау тапсырылды. Ал келесі сенбілікте аудандағы саябақтарға тиісті тазалық жұмыстары жүргізіліп, жаңа көшеттер отырғызылатын болады. Сол сенбіліктерде де тұрғындардың қатысу қарқыны жоғары болады деп есептеймін,-дейді ол.

Бұл күні табиғат көзі ызғар тартқанымен тұрғындардың сенбілікке қатысу деңгейін төмендете алмады. Бұл ең алдымен өзіміздің қоршаған ортаға деген құрметтің белгісі болса керек.

С.КӨШЕКОВ