Индербордың Барлаушылар бөлігінде орналасқан №110 сайлау учаскесінде дауыс берушілердің қатары көп екен.
Олардың арасынан таяғына сүйене бюллетенін сайлау жәшігіне салып жатқан атақты геолог, академик, Индер ауданының Құрметті азаматы Хасан Қамашевты кездестірдік.
- Көптен аяғымды баса алмай қалып үйден шықпайтын едім. Жас 87-ден асты ғой. Сайлау күні үйде тыныш жата алмай, даусымды берейін деп шықтым. Бұл менің азаматтық парызым ғой. Әрі бой жазып, жерлестерімді көріп бір марқайып қалдым, - деді ол.
Ал кент тұрғыны Аққаным Мұханбетқалиева отбасымен келіп дауыс беруде екен.
-Бүгін қызым Альбинаның туған күні де сайлау күнімен қатар келіп жатыр. Таңертең ертемен шығып, қызыма сыйлығымды алып, осында келіп азаматтық парызымыз ретінде дауысымызды берудеміз. Индеріміздің қайта көркейіп жатқанына ризамыз, - деді ол көңілді кейіппен.
-Учаскеде негізі 1886 сайлаушымыз бар. Оның ішінде денсаулығына байланыс келе алмай отырған 116 адамға дауыс беруіне сайлау жәшігін тасымалдап апарамыз. Сайлаушылардың белсенділігі жоғары. Әсіресе сағат 10-11 аралығында сайлаушылардың қатары көп болды. Мүмкіндігінше барлық санитарлық талаптарды сақтаудамыз, - деді учаскелік сайлау комиссиясының төрағасы Айман Меңдігереева.
С. Базарбаев