«JASTAR OTANGA» жазғы жастар лагері аясында қатысушылар облыс әкімі Нұрлан Ноғаевпен кездесті.

Өңір басшысы алдымен жастардың 5 күн аясында өткізген күндері туралы баяндалған бейнероликті тамашалады. Алдымен Атырау облыстық жастар саясаты мәселелері басқармасының басшысы Роллан Құспан мұнайлы аймақта жастар саясатын дамытуда іргелі істердің бар екенін айта келе жастар тарапынан көтерілген ұсыныс-бастамаларға лайықты дәрежеде қолдау көрсеткен облыс басшылығына ризашылығын білдірді.

Кездесуде жалын жүректі жастар өз ұсыныстарын білдіріп, бірқатар сауалдарын қойып, нақты жауаптарын алды. Ал сөз алған облыс әкімі Нұрлан Ноғаев қазіргі таңда жастарға оларды оқып, білім алуына, жұмысқа орналасуына, мамандық игеруіне мемлекет тарапынан үлкен мүмкіндіктер жасалып жатқанын тілге тиек етті. Сонымен қатар, лагерь орналасқан Индер ауданының қазба байлығын игеру мақсатында аудан басшылығымен бірлескен жұмыстардың жасалып жатқанын, осы орайда аудан тұрғындары мен жастары өз белсенділіктерін танытып, басталған істің сәтімен жүзеге асуына зор үлестерін қосарына сенім білдірді.

Кездесу соңында Индер ауданының әкімі Мейірім Қалауи жастармен кездесуге уақыт бөлгені үшін облыс басшысына аудан жастарының атынан алғыс айтты. Индерлік жастар танымал бард ақын Табылды Досымовтың әндерінен попурри орындады.

 Жастар Орталығы Индер.