Нәсіпқалиев Нысаналы Нәсіпқалиұлы аудандық қорғаныс істері жөніндегі бөлімнің жұмылдыру бөлімшесінің бастығы қызметін атқарады. Шені – майор. Күні кеше ол Қазақстан Республикасының Қорғаныс Министрінің бұйрығымен ІІ дәрежелі «Мінсіз қызметі үшін» медалімен марапатталды.
Қызылқоға ауданы Тасшағыл ауылында дүниеге келген ол Абай атындағы мемлекеттік университетті аяқтаған және осы оқу ордасы жанындағы әскери кафедраны тәмамдаған. Бұған дейін Қызылқоға аудандық қорғаныс істері жөніндегі бөлімде аға көмекшіден бастап, аталмыш бөлімнің бастығы қызметін абыройлы атқарған. 2021 жылдан бері Индер аудандық қорғаныс бөлімінде қызметін жалғастыруда.
– Аудан көлеміндегі әскери жиындарға дайындықты және өткізуді ұйымдастыру – міндетім. Қызмет барысында әскери міндеттілермен жұмыс жүргіземін, әскери қызметке кіруге ниет білдірген азаматтарды келісімшартпен қабылдауды жүзеге асырамын. Отан қорғау жолындағы үздіксіз атқарып келе жатқан еңбегімді бағалап, марапатқа ұсынып жатқанына разымын. Ал, бастысы, еліміздің әрбір азаматы қасиетті Отанымызды қорғауға қашанда дайын болуы керек, - деді ол.
Ауданның қорғаныс істері жөніндегі бөлімнің бастығы, подполковник Батырхан Назаров әріптесін жұмысына тындырымды, жауапкершілігі зор қызметкер ретінде атап өтті.
С.БАЗАРБАЕВ
