Индерборда орталық базар маңынан жаңадан тегершік жөндеу орталығы қатарға қосылды.
Мұны ашу үшін кәсіп иесі Дулат Нұрбекұлы аудандық кәсіпкерлер палатасы арқылы «Бастау-бизнес» жобасын аяқтап, «Еңбек» бағдарламасы бойынша мемлекеттік 555 600 теңге грантты иеленіпті.
- Қызмет көрсетер орнымды өзім мүмкіндігінше жасақтап алдым. Әзірге жөндеу орталығымның атауын қойған жоқпын. Шүкір, тұтынушылар бастап келуде. Бастысы қызметімді сапалы атқаруға әрі бағасын қолжетімді ұстауға ұмтылудамын, - деді ол.
Аудандық кәсіпкерлік палатасының директоры Дәурен Сағынғалиевтің айтуынша, ауданда биыл «Бастау-бизнес» жобасы бойынша 150 адам оқуды аяқтап, оның 57-і мемлекеттік грантқа ие болған. Соның бірі Дулат Зинолланың тегершік жөндеу орталығы кент бойынша 6-шысы екен. Ендеше, кәсібін жаңадан бастаған жас кәсіпкерге сәттілік тілейміз.
С.САНСЫЗБАЙҰЛЫ
