Бөдене ауылындағы Мөңкеұлы көшесінің бір топ бүлдіршіндері есік алдындағы ескі саябақтың ішіне күрке тігіпті.

Көрші балалар болып «Күннің ыстығынан қорғанымыз» деп тіккен күркелері кәдімгі киіз үйге ұқсақ. Олар киіз үйдің уықтары секілді саябақтың ішіндегі талдарды бір-біріне байлап, сыртын жұқа жамылғылармен жауыпты.

Ал кейбірі үлкен қарағайдай биік-биік теректердің жандарын уақ ағаштармен қуыс-тесіктерін бітеп тастап алыпты. Соның ішіне үйден айран, сүттерімен бірге тәттілерін әкеліп күні бойы ішінде отырады екен. Тіпті қонып қалуға бар екен.

Бұл жөнінде көше тұрғыны Гүлнар Өтешқалиева:

-Балаларым үйде сабақ оқып болғаннан соң, осы жаққа қарай ағылады. Әйтеуір осы күркелері тым-тәуір жақсы болды. Себебі күнұзаққа ұялы телефоннан бас алмай сабақ оқитын олардың бір уақыт милары демалып, таза ауада болады. Бір жағынан көз жанарларына әсері мол,-дейді.

Бір қызығы, алдында аяқ астынан жел соғып, жаңбыр жауғанда күркелерін құлатып, заттарын ұшырып әкетіпті. Бір-біріне бауырмал бір көшенің бүлдіршіндері бос уақыттарын осы күркеде өткізеді.

Диас АЙБАРОВ

Бөдене ауылы