Қызылорда облысы, Жаңақорған ауданының әкімі Руслан Рүстемов «Атырау-Ақпарат» ЖШС-не қарасты «Атырау» қоғамдық-саяси газетінің жауапты хатшысы Дәурен Мұхамбеталиев пен «Дендер» Индер аудандық газетінің бас редакторы Жанай Амантурлинді қабылдап, келелі әңгіме құрды.
Аудан басшысы рухани- мәдени бағытта атқарылып жатқан бастамалар, халықтың тұрмыстық жағдайын жақсартатын жобалар жайлы сөз етті. Сыр бойында қаламгерлік ізі қалған атыраулық жазушы- журналистердің еңбегін атады. Жаңақорған ауданындағы тарихи орындардың құндылығы жайында және жергілікті ақын- жазушылардың еңбегін әңгіме өзегі етті. Қонақтар мәдениет, руханият саласындағы мемлекеттік саясаттың өзекті мәселелерін, қазақ журналистикасының алдындағы жауапкершілік жүгі және өңір-өңірдегі журналистердің өзара шығармашылық байланыс орнатуының маңызына тоқталды.
Одан кейін атыраулық әріптестер «Жаңақорған тынысы» газетінің шығармашылық өкілдерімен еркін форматта кездесіп, әріптестік байланысты орнату жөнінде пікір алмасып, тәжірибелерімен бөлісті. «Сыр медиа» ЖШС газет таратуды қолға алып, басылымды оқырмандарға уақытылы жеткізіп беруді жолға қойды. «Атырау- Ақпарат» ЖШС осы үрдісті пилоттық жоба ретінде енгізіп, тәжірибеден өткізуде екен. Сондықтан қонақтарды газет таратудың тетіктері қызықтырды. Кездесу барысында қонақтар газеттің таралым ауқымын кеңейту, арнайы беттер ашу жөнінде ой бөлісті, сонымен қатар, әлеуметтік медиа мен блогсфера нарығында бәсекеге қаншалықты қабілеттіміз, ақпараттық бәсекеде орнымыз қандай деген сұрақтарға жауап іздеді...
Сарайшықтың қасиетін білетін қаламгерлер Сығанақ қаласына арнайы барды. Ұлы Дала елінің өркениет орталығындағы археологиялық қазба жұмыстарын көріп, қаланың тарихи маңызы жайында ойларымен бөлісті.
zhanaqorgan-tynysy.kz
