Атырау облыстық нотариалдық палатасы мүшелері қаржы жинап, бірнеше аудандағы ауруханаларға кислород концентратын сыйға тартқан болатын.

Бүгінгі таңда өте қат болып отырған аппарат біздің өңірге де келіп, оны палата мүшелері, яғни, нотариус Мұрат Нұрымов бас дәрігер Бауыржан Төлегенге табыс етті. Бұл 600 мың теңге шамасында тұратын «Ар-мед» кислород концентраторы Ресейдің Новосибирск қаласынан шыққан, 10 жылға дейін жұмыс жасауға жарамды. Кепілдік мерзімі де бар. Бір мезетте екі науқас қатар тыныстай алады. Көмектесіп жатқан баршаға алғысын білдірген бас дәрігер:

-Қазір 14 аппарат келіп отыр. Өткенде қатты қиналған кезде күніне 60-70 баллоннан кетті. Қазір осы аппараттың арқасында арқамыздан жүк түскендей болды. Аурухана да, емхана да дәрі жеткілікті. Облысқа келген дәрілер бізге келіп жатыр. Бір күнде 3-4 адам емделіп шығып жатыр. Дегенмен кейбір адамдар ауруды өткізіп алып келеді. Осыған сақ болған жөн. Сондай-ақ дәрігер мамандардың алды келіп жатыр. Бұйырса, маманмен толық қамтылады. Науқастарға арналған 34 орын бар. Өткен аптада 303 науқас тіркелсе, оның 70 пайызы емделіп шықты,-дейді.

Осылайша көп болып елге келген кеселдің бетін қайтаруда. Енді әр адам карантин талаптарын қатаң сақтап, оның таралмауына жол бермегені абзал.

Ж.ІСІМ