ҚР Тәуелсіздігінің 30 жылдығына арналған «Қазақстан – спорттық ұлт» жобасы аясында облыс бойынша қысқы спорт айының ашылуы өтті, деп хабарлайды ATPress.kz

Салтанатты шараға облыс әкімінің орынбасары Бақытгүл Хаменова және Атырау облысы дене шынықтыру және спорт басқармасының басшысы Ринат Ибрагимов қатысты. Шарада «Бейбарыс» хоккей клубының жанына құрылған жас хоккейшілер мен мәнерлеп сырғалаушылардың қойылымдық көрсетілімі ұсынылды.

- Ақпан айы басталғалы ел президентінің алға қойып отырған басты мәселесі – бұқаралық спортты дамыту, оның ішінде жасөспірімдер мен жастар арасындағы спортты нығайту. Облыс әкімі М.Досмұхамедовтың тікелей бастамасымен спортқа дең қойып жүрген ұл-қыздарымызға арналған шаралар облысымызда ұйымдастырылуда. Бұл жердегі басты мақсат – той – тойлап көңіл көтеру емес, салауатты өмір салтын насихаттау, – деді Бақытгүл Хаменова.

Қысқы спорт айының ашылуы шаңғы тебу жарысымен жалғасты.Шаңғы тебуден ерлер арасында 1 орынға Мұстахимов Саят ие болса, қыздар арасында Қабақ Жансая марапатталды.