АСТАНА. ҚазАқпарат – Мемлекет басшысы Үкіметке еліміздің газ өңдеу қуатын арттыру үшін жаңа жобаларды жүзеге асыруды тапсырды. Сонымен қатар, Президент суды барынша үнемдеу керектігін ескертті, деп хабарлайды ҚазАқпарат тілшісі.

«Инфрақұрылымды дамыту қажет. Энергетика, су және көлік қауіпсіздігін қамтамасыз етуге бағытталған кешенді шаралар қабылдануға тиіс. Энергетикалық активтерді жаңғыртуға жақын арада жаңа инвестиция тарту керек. Бұл жұмысты «Тарифті инвестицияға айырбастау» бағдарламасы арқылы іске асыруға болады. Қазір тауар газының тапшылығы күшейіп барады», - деді Қасым-Жомарт Тоқаев Мәжілістің жалпы отырысында.

Мемлекет басшысы газ өңдеу қуатын арттыру үшін жаңа жобаларды жүзеге асыру және суды барынша үнемдеу қажеттігіне тоқталды.

«Сонымен бірге, 25 су қоймасын салып, суды барынша үнемдеу керек. Қазақстан тұрақты даму үшін Азия мен Еуропаны жалғайтын әлемдік көлік хабына айналуы қажет. Бұған дейін қолға алынған көлік және логистика жобаларын түгел уақтылы бітіру өте маңызды», - деді Президент.