Қазан қаласында «Новая волна – 2025» халықаралық байқауы өтіп, онда қос бірдей Қазақстан жүлде алып, жақсы жаңалық жеткізді.
Соның бірі еліміздің өнерін шет елге танытып жүрген жерлесіміз, аққалалық Ерназар Жұбан өз өнерімен жұртшылықты тәнті етіп, әділқазылардың жоғары бағасына алып, үшінші орын иегері атанды.
Бұл табыс – жеке орындаушының ғана емес, тұтас қазақ музыкасының мерейін өсірген сәт. Ерназардың сахнадағы әсерлі бейнесі мен кәсіби деңгейі тыңдарман жүрегін баурап, халықаралық сахнада ұлттық өнердің жаңа тынысын ашты.
Жеңіс – оның қажырлы еңбегінің, үздіксіз ізденісінің және табиғи талантының жемісі. Бұған дейін жас әнші Беларусьтің Витебск қаласында ұйымдастырылған «Славян базары» халықаралық фестивалінде бірінші орынды иеленген болатын.
Ерназар өз сөзінде қуанышын былай жеткізді:
– Бұл жолы жеңіс бұйырды, алайда ол бірінші орын емес. Бірақ ең бастысы – бас жүлде де Қазақстанға келді. Бұл – ортақ қуанышымыз. Алғашқы кезеңде 12-ші орында болдым, кейін 9-орынға көтеріліп, соңында үздік үштікке іліктім. Қазақстанның қоржынында бірінші де, үшінші де орын бар. Әріптесім Саша Лимді шын жүректен құттықтаймын. Қазақстан тек алға! – деді ол.
Айта кетейік, бас жүлдені жеңіп алған Александр Лим «Новая волна – 2025» тарихында топ жарған алғашқы қазақстандық болды.
Ақмарал Бокирова
