Сәрсенбінің сәтінен бастап ауданда телеарналардың саны 11 каналға толықты. Бұл туралы бізге аудандық ішкі саясат бөлімінің басшысы Артур Мурзин хабарлады.

Спутниктік антенналарды қоспағанда әдетте теледидарымыздан «Қазақстан-1», «Хабар», «Евразия», «Хабар24» каналдарымен ғана шектелетін едік. Енді оған «Еларна», «Балапан», «Kazsport», «Атырау», «ҚазақТВ», «АбайТВ», "Caspian news.kz" телеарналары қосылып, ақпараттық аямыз кеңіп отыр. Әсіресе, балалардың сүйіп тамашалайтын - «Балапан», спорт сүйер қауымының «Kazsport» арнасы қолжетімді болуы көпті қуантады. Сондай-ақ мәдени-ағарту бағытындағы «Abai tv» телеарнасы биыл ғана қосылғаны белгілі.

«Қазтелерадио» АҚ филиалы облыстық радиохабар тарату дирекциясының директоры Арон Сабировқа хабарласқанымызда, бұрынғы арналар аналогтық хабар тарату арқылы болса, ендігісі заманауи цифрлық сапада жүзеге асып отыр. Әзірге жаңа каналдармен аудандағы станса арқылы Көктоғай мен Өрлік ауылдарынан басқасын қамтуға мүмкіндігі бар. Ал аталған ауылдар келесі жылы ғана қосылатындығын қаперге берді.

Осылайша аудан әкімдігінің «Телеграм» чат каналында жиі қозғалатын мәселе оң шешімін тауып отыр.

С.САНСЫЗБАЙҰЛЫ