Бүгін ауданымызда Атырау облыстық жастар театры қазақтың көрнекті композиторы, Қазақстанның еңбек сіңірген қайраткері, Қазақстанның Еңбек Ері Ілия Жақановтың өмірі мен шығармашылығына арналып жазылған «Еділ мен Жайық» мюзиклін көпшілікке ұсынды.
Қойылымда композитордың соғыс жылдарымен тұспа-тұс келген балалық шағынан бастап, азаматтық ұстанымы, қайраткерлік болмысы мен елге деген сүйіспеншілігі көркемдік шеберлікпен бейнеленді. Жас Ілияның жүрегіне ізгілік дарытқан әке-шеше тәлімі, Ахмет Жұбановтың батасы, рухтас серіктері Жұбан мен Шәмші бейнесі, елдік рухты көтерген Махамбет батырдың елесі көрермен жүрегін тебірентті.
Шара алдында аудандық кітапхана ұжымы композитордың өмірі мен өнерін танытатын кітап көрмесін ұсынды. Ал шығармашылық ұжым сапарларын қасиетті Қаройдағы Махамбет баба мазарына тағзым етуден бастады.
Аудан әкімі С.Нсанбаев театр әртістеріне ризашылығын білдіріп:
«Ілия ағамыздың өнерін насихаттап жүрген Атырау жастар театры ұжымына айрықша алғыс айтамын. Бұл қойылым – ауданымыздың мәдени өміріне жаңа леп берді», – деді.
Жас театрдың өнеріне көпшілік зор ілтипат көрсетіп, жоғары баға берді.
Сұңқар КӨШЕКОВ
Индер ауданы
