Ауданымызда ауыл шаруашылығы, тамақ және өңдеу өнеркәсібі қызметкерлерінің кәсіби мерекесі жоғары деңгейде өтті. Бұл күні жыл бойы күннің астында шаруадан қол үзбей жүрген еңбекшілер бір уақыт жұмыстан босап, арқа-жарқа болды.
Есбол мәдениет үйінде өткен шарада ауыл шаруашылығы жәрмеңкесі ұйымдастырылып, спорттық шаралар мерекенің көрігін қыздырды. Одан соң салтанаттты шараға жайғасты.
Аудан әкімі Д.Шамұратов барша еңбекшілерді мерекелерімен құттықтап, олардың халықты азық түлікпен қамтудағы орасан зор үлестерін ерекше атап өтті. Соның ішінде саланың үздіктерін марапаттап, төрге шығарды.
Олардың қатарында: «Үздік шопан» номинациясы бойынша - «Алихан» шаруа қожалығының басшысы Қайыржан Адиров, «Үздік мал дәрігері» - Өрлік ауылдық округінің мал дәрігері Қайдар Бисенов, «Үздік егінші» -«Весна» шаруа қожалығының басшысы Александр Матвеев, «Үздік механизатор» - «Ербол» шаруа қожалығының қызметкері Бауыржан Сұлтанғалиев, «Үздік шаруашылық» - ағайынды Киікбаевтар бар. Озаттарға арнайы лента тағылып, бағалы сыйлықтар тапсырылды.

   Сонымен қатар «Қуанов Мұрат» шаруа қожалығының басшысы Қуанов Мұрат пен «Қайша» наубайханасының басшысы Азамат Баймұханұлы аудан әкімінің алғыс хатымен марапатталды.
Салтанатты жиында аудандық мәслихат хатшысы Б.Сапаров сөз алып, «Бірлік» шаруа қожалығының қызметкері Нұржамал Ақжігітова мен «Бектен» шаруа қожалығының басшысы Алтынай Теңелбаеваны аудандық мәслихаттың алғыс хатымен марапаттады. Фермерлер одағының аудандағы жетекшісі І.Мұрат облыстық фермерлер одағының алғыс хатын ауыл шаруашылығы саласының ардагерлері Ыдырғали Сайханұлы мен Тыныштық Азановты және «Айтөре» шаруа қожалығының басшысы Қонай Бисенғалиевтерге тапсырды.
Өңіріміздің жарқын да бақытты болашағы үшін аянбай еңбек еткен еңбеккерлерге арнап, ауданның көркем өнерпаздары ән-биден шашу шашты.