Мемлекет басшысы Қасым-Жомарт Тоқаевтың «Таза Қазақстан» бастамасы қоғамда тазалық пен жауапкершілік мәдениетін қалыптастыруға серпін берді. Бүгінде түрлі мекеме қызметкерлері мен тұрғындардың сенбіліктерге қатысып, аулалар мен көшелерді абаттандыруға үлес қосуы – жақсы үрдіс.

Туған жердің таза болуы әрқайсымыздың күнделікті әрекетімізге байланысты. Сенбілікке қатысып, тазалық жұмыстарын атқару маңызды, бірақ одан да маңыздысы – тазаланған аумақты қайта ластамау. Осындай қарапайым қағиданы бәріміз ұстансақ, тазалық уақытша акция емес, тұрақты өмір салтына айналады.

Жаңылсын Жұмағалиева

Медицина саласының ардагері,

Кент тұрғыны

Мемлекет басшысы Қасым-Жомарт Тоқаевтың бастамасымен жүзеге асып жатқан «Таза Қазақстан» жалпыұлттық акциясы қоршаған ортаны абаттандырумен қатар, қоғамда тазалық мәдениетін қалыптастыруға бағытталған маңызды бастама деп есептеймін. Бұл жұмысты тек сенбілік кезінде емес, күнделікті өмір салтына айналдыру қажет.

Өзіміз тұратын көшеге, аулаға, ауылға жанашырлықпен қарау – туған жерге деген құрметтің бір көрінісі. Әр адам «бұл жерді біреу тазалайды» деген түсініктен арылып, өзінен бастағанда ғана нәтижелі өзгеріс болады.

«Таза Қазақстан» – бір күндік науқан емес, ортақ мәдениетке айналуы тиіс игі іс. Бүгінгі тазалыққа қосқан үлесіміз – ертеңгі ұрпаққа қалдырар жақсы үлгі.

Айдана Саматова

Ұстаз

Мемлекет басшысы Қасым-Жомарт Тоқаев «Таза Қазақстан» бастамасы арқылы елді мекендердің тазалығына ғана емес, азаматтардың қоршаған ортаға деген жауапкершілігін арттыруға да ерекше мән беріп келеді. Бұл – баршамызды ортақ іске жұмылдыратын маңызды қадам.

Меніңше, тазалық мәдениеті адамның өз үйінен, ауласынан және күнделікті әдетінен басталады. Біреудің артынан тазалау емес, айналаны ластамауға дағдылану – нағыз мәдениеттіліктің белгісі. Сондықтан сенбіліктермен қатар, тұрақты түрде түсіндіру жұмыстарын жүргізіп, балаларға кішкентайынан табиғатты аялаудың маңызын үйрету қажет.

Туған жеріміздің таза әрі көрікті болуы тек мемлекеттік мекемелерге емес, әр тұрғынға байланысты. Әркім өз аумағына жауапкершілікпен қараса, «Таза Қазақстан» идеясы нақты нәтижеге айналады.

Баян Билялова

кент тұрғыны

Өмірде әр адам қиындыққа, түсініспеушілікке немесе ауыр эмоциялық кезеңдерге тап болуы мүмкін. Мұндай сәтте адам өзін жалғыз сезінуі ықтимал. Алайда қандай жағдай болса да, өз өміріне зиян келтіру мәселені шешпейді.

Ең бастысы – қиындықты жалғыз көтермеу. Сенім артатын ата-анаға, жақын адамға, мұғалімге немесе басқа да ересек адамға ішкі уайымыңды айту маңызды. Біреумен сөйлесу жағдайға басқа қырынан қарауға және көмек жолын табуға мүмкіндік береді.

Қоғамда әр адамның жанындағы адамға немқұрайлы қарамай, оның сөзін тыңдап, қолдау көрсетуі маңызды. Әсіресе жасөспірімдердің көңіл күйіне назар аударып, олармен ашық әрі сенімді қарым-қатынас орнату қажет.

Қандай қиындық болса да, одан шығудың қауіпсіз жолы бар. Көмек сұрау – әлсіздік емес, өзіңе қамқорлық жасаудың маңызды қадамы. Өмір – құнды, ал мәселе – шешімін табуға болатын жағдай.

Гүлбану Насиполла 

Жол қауіпсіздігі – баршаға ортақ жауапкершілік. Соның ішінде көлік құралын мас күйінде басқару – жүргізушінің өзіне ғана емес, жолдағы басқа адамдардың өмірі мен қауіпсіздігіне де үлкен қатер төндіретін жауапсыз әрекет.

Алкоголь адамның зейінін төмендетіп, реакциясын баяулатады және жолдағы жағдайды дұрыс бағалау қабілетіне әсер етеді. Мұндай жағдайда көлік басқару күтпеген жағдайларға әкелуі мүмкін.

Сондықтан әр жүргізуші жолға шығар алдында өз жауапкершілігін сезінуі қажет. Егер алкоголь ішкен болса, көлік жүргізуге болмайды. Такси шақыру, жақын адамнан көмек сұрау немесе басқа қауіпсіз жолды таңдау – дұрыс шешім.

Жолдағы тәртіпті сақтау – заң талабы ғана емес, адам өміріне деген құрмет. Мас күйінде көлік жүргізуге жол бермей, жол қауіпсіздігін бірге қамтамасыз етейік.

Гүлбану Насиполла 

Қазіргі қоғамда жасөспірімдер арасында буллингтің алдын алу маңызды мәселелердің біріне айналып отыр. Буллинг – бір адамды әдейі кемсіту, қорқыту, мазақ ету немесе қысым көрсету арқылы оған психологиялық тұрғыдан зиян келтіретін әрекет. Ол мектепте, аулада, достар арасында немесе әлеуметтік желілерде кездесуі мүмкін.

Буллингке тап болған бала өзін жалғыз сезініп, өзіне деген сенімін жоғалтуы мүмкін. Сондықтан мұндай жағдайды елемей қалмау – әр адамның жауапкершілігі. Оқушы қиындыққа тап болған жағдайда ата-анасына, мұғаліміне немесе сенім артатын ересек адамға айтуы қажет.

Буллингтің алдын алуда отбасы мен мектептің өзара байланысы ерекше маңызды. Баламен ашық сөйлесу, оның пікірін тыңдау және мәселесін назардан тыс қалдырмау көптеген келеңсіз жағдайлардың алдын алуға мүмкіндік береді.

Әр бала құрметке, түсіністікке және қауіпсіз ортада білім алуға құқылы. Бір-бірімізді кемсітпей, қолдау көрсетіп, өзгеге құрметпен қарау арқылы ғана буллингсіз орта қалыптастыра аламыз.

Гүлбану Насиполла