Жерлесіміз Сапанова Әсемгүл Қанатқызы Instagram тікелей эфирінде өткен конкурстың жеңімпазы атанды.
Ол блогер Дархан Жолшыбеков ұйымдастырған конкурс шартына сай арнайы курсты 29 990 теңгеге сатып алып Алматыдағы 300 млн теңге тұратын үйдің иесі болды.
- Мен блогердің әлеуметтік желісінен көріп бастапқы 100 шақты жеңімпазға 1 млн қаржылай сыйақының және басқа да айфон секілді бағалы заттардың ойнатылатынын біліп аяқ асты қатыса салғанмын. Бас жүлдеге ие боламын деген ой мүлдем болған емес. Естігенде таң қалдық. Алла бізге бұйыртты, - дейді қуанышын жасыра алмаған көпбалалы ана.
Кейіпкеріміз алғаш жүздіктен табылмай 2000 теңге ұтқанын естігенде тауы шағылып, бәрі жалған екен деп ойлаған. Кейін бас жүлде бұйырғанын таныстарынан естігенде де сене қоймаған. Блогер өзі хабарласып құттықтағанда ғана төбелері көкке жетіпті.
Айта кетейік, жеңімпазымыздың жары Диас төтенше жағдайлар бөлімінде қызмет атқарса өзі 4 баласының тәрбиесімен айналысып үйде отырған қарапайым жан.
Ақмарал БОКИРОВА
Индер ауданы
