«Бұл өте үлкен мәселе. Нақты медициналық сақтандыруға көшу қажеттігін көп жыл бойы айтып келеміз. Қазір жасалған Әлеуметтік медициналық сақтандыру қоры іс жүзінде «сақтандыру» емес, салық сияқты. Жұмыс істейтін адамдар тиісті жарнасын медициналық сақтандыру қорына төлеп жүр. Ал сол жиналған қаражаттарды жұмсайтын кезде жарна иелерінен сұрамай, қордың өзі игеріп отыр. Өзінің жарнасы түсетін әрбір азаматтың медициналық сақтандыру қорында жеке есепшоты болуға тиіс. Осы арқылы кез келген адам өзіне емхана мен дәрігерді таңдау керек. Сондай-ақ көрсетілген медициналық қызметке төлем жасау құзыреті өзінде болуға тиіс. Сонда қызметкерлер өз міндеттеріне ұқыптылықпен қарайды, ал жұ­мысына адал медицина қызметкерлері ауыр еңбегі үшін лайықты жалақы алады. Тіпті науқас өзін сапасыз емдегені үшін медициналық ұйым мен қызметкердің қызметтеріне төлем жасаудан бас тарта алатындай құқығы болуы керек. Нағыз әлеуметтік медициналық сақтандыру деген осы. Шын мәнінде нағыз сақтандыруға көшсек, әр адам қай клиникаға барғысы келеді? Кім дәрігердің көмегін алғысы келеді? Мұның бәрі өз таңдауыңызда әрі қолыңызда жарна салып, жинаған қаражатыңызды өз денсаулығыңыз үшін жұмсай алуыңызда. Міне, сол кезде сіздерде қазіргідей ауыртпашылық болмайды», деді Азат Перуашев.

Egemen Qazaqstan

Айнұр Сәбитова бүгінгі жастар өте белсенді және позитивті екенін атап өтті. «Қазіргі ұрпақ болашаққа үмітпен қарап, үлкен өзгерістерді күтіп отыр. Мұндай сәттерде экологиялық жауапты адамдардың біртұтас қоғамын құру тәсілдерін дұрыс қалыптастыру және түсіну өте маңызды. Мұндай қоғам өз кезегінде ауаның, судың, табиғаттың тазалығы сияқты мәселелермен күресетін болады», деді ол.

Владимир Мартель өз кезегінде Медеу тау шатқалында өткізілетін барлық іс-шаралар экологиялық мәдениетпен және табиғатқа ұқыпты қараумен байланысты екенін айтты. «Бүгінгі таңда саламатты өмір салтын ұстану және оны дамыту бағытындағы іс-шаралар өте маңызды», деп атап өтті кандидат.

«Байтақ» жасылдар партиясының өкілдері дәрігерлермен де кездесті. Саяси ұйым төрағасы елордадағы көпсалалы әлеуметтік-медициналық мекемелердің бірінде сайлауалды бағдарла­ма­ны таныстырып, сауалдарға жауап берді. Ақ халатты абзал жандар қоғамдағы түйткілді мәселелерді көтеріп, оларды шешу жолдары бойынша ұсыныстарын айтты. Аталған мекемеде 60-қа жуық маман еңбек етеді. Жүздесу барысында партия белсенділері елде жүргізіліп жатқан саяси реформа төңірегінде ой бөлісіп, пікір алмасты. Үгіт-насихат жұмыстарының аяқталуына аз уақыт қалды. Бұл ретте кестеге сай іс-шаралар қыза түсті. Айта кетейік, байтақ­тықтар қазір үш жарым мыңнан астам кездесу ұйымдастырды. Алдағы күндері респуб­ликалық штаб өкілдері оңтүстік өңірлерді аралауды жоспарлап отыр.

«Республикалық штаб пен барлық аймақтағы штабтардың жұмысы бақылауда. Халықтың сайлауға деген ынтасы жоғары. Сайлаудан үлкен үміт күтіп отыр», деді партия төрағасы Азаматхан Әміртаев.

Egemen Qazaqstan

«Біздегі бітпейтін жырға айналған саланың бірі – медицина. Дәл осы салаға келгенде кімнің болса да көңілі күпті. Суық тиіп ауырған баланың ауруханадан сал боп шығатынына көз үйренді. Өзіне ескертусіз он екі мүшесінің бірінен айырылып жататын елдің қарасы көбейді. Әйтеуір, қазір медициналық мекемелер мен дәрігерлерді сотқа сүйрейтін оқиға өте көп. Ең өкініштісі, әрбір жағдайдың артында адам тағдыры тұр. Әлеуметтік желілерден екі күннің бірінде дертіне дауа іздеп, отандық медицинадан көңілі қалған жазбаларды оқитын болдық. Қоғам белсенділері мен сарапшылар «Біздегі медицинаның дамуы кемі 30 жылға артта қалды» деп отыр. Жұрт тегін емге арқа сүйемейтін болған. Айлап кезек күткенше, ауруын асқындырып алудан қорқып, сол күні қабылдайтын ақылы қызметке жүгінеді. Осыдан кейін медицинадан мән кетті деуге әбден негіз бар. Тіпті, кейбірі көрші мемлекеттерге барып қаралуға мәжбүр.

Оның үстіне Қазақстанда медицина мамандарының кәсіби дайындығы көңіл көншітпейді. Әсіресе, ауылдық жерлерде медициналық қызметтің сапасы төмен. Бүркеген жерден бүрге шығарын ескерсек, алдымен осы олқылықтың орнын толтыру керек. Денсаулық сақтау саласына қатысты күнде бір жиын өтіп, жиі-жиі талқылауға ұшыраса да, бұл саланың мәселесі азаймай отыр. Кезінде денсаулық сақтау саласы мамандары шетелдің жоғары оқу орындарымен бірлесе отырып, еліміздің медициналық білімін жаңғырту шаралары қолға алынғанын айтқан еді. Финляндияның тәжірибесі негізінде бакалавриат бо­йынша медбикелік білімді жаңғырту шаралары да қолға алынған. Алайда онда дәріс алып жатқанның барлығы бірдей ауылға бармайды. Себебі, оларды міндетті түрде ауылды жерлерге жіберу қарастырылмаған. Осы тұста ауылға дәрігер тарту үшін осы бағытта білім алушылармен келісімшартқа отыру шараларын да қарастырып көру керек сияқты», деді А.Сағандықова.

Egemen Qazaqstan

Кандидат Нұрлан Әуесбаев құрылыс саласы жемқорлық белең алған салалардың бірі екендігін атап өтті. Оның пікірінше, заңсыз әрі тұрғындардың пікірі ескерілмей, көппәтерлі үйлер салынатын жер учаскелері бөлініп жатыр. Ал кандидат Мақсұт Насибұлов еліміздің құрылыс саласында тамыры тереңге кетіп жатқан сыбайлас жемқорлыққа қатысты алаңдаушылық білдірді. Митинг соңында қарар қабылданып, тиісті органдарға жіберілді.

ЖСДП-дан Парламент Мәжілісінің депутат­тығына партия тізімі бойынша кандидат Берік Жағыпаров пен Жеңіскүл Дүзбаева Ұлытау облысы сайлаушыларымен кездесті.

Депутаттыққа кандидаттар сайлаушыларды пар­тияның сайлауалды бағдарламасымен таныстырды. Несие мөлшерлемесін төмендету, кәсіпкерлердің салығын азайту және зейнетақы жасын төмендету мәселелері көтерілді. Іс-шара барысында кандидаттар тұрғындардың сұрақтарына жауап берді.

ЖСДП-дан Парламенті Мәжілісінің депутат­тығына партия тізімі бойынша тағы бір кандидат Виктор Калгин ЖСДП-ның «Үгіт-насихат пойызы» аясында Шемонаиха қаласына барды.

Сайлаушылармен кездесу барысында кандидат ЖСДП бағдарламасының басты ұрандарын атап өтті: саяси реформалар бағытын күшейту; халықтық парламенттік бақылау – жемқорлықтың басты тос­қауылы; халықтың еңсесін көтеріп, олигархтар­ды әшкерелеу; азаматтардың әл-ауқаты дең­гейін арттыру; баршаға қолжетімді әлеуметтік қол­дау: мықты ауыл – ел қауіпсіздігінің негізі.

Egemen Qazaqstan

Партияның сайлауалды бағдарламасын таныстырған соң кандидаттар Парламентте атқа­рыл­ған жұмыстар жайлы айтты. Жұмысшылар көкейдегі сұрақтарын қойды. Көпшілікті әлеуметтік әділеттілік, «Жеке тұлғалардың банкроттығы туралы» заң мен әділ сайлау мәселелері қызықтырды.

Жұмысшылардың бірі тәуелсіз бақылаушылар санының жеткіліксіздігін айтып, халықтың сайлаудың әділ өтетініне сенуден қалғанын, тәжірибе көрсеткендей, сайлау учаскелеріне келмеген адамдардың орнына бюллетеньдер толтырылатынына назар аударды.

«Сайлау үдерісінің ашықтығы мен жария­лы­­­ғын қамтамасыз ету мақсатында біз дауыс беру күні сайлау учаскелеріндегі барлық рәсім­дер­ге бей­небақылау енгізуді ұсынамыз. Сон­дай-ақ, элек­т­рон­ды дауыс беруді енгізуді қарас­тыру қа­жет. Қазір барлығын телефон арқылы жасаймыз. Көп­­те­ген сай­лаушылар дауыс беру күні кезекте тұр­­ғысы келмей, дауыс беру құқығын пайдалан­бай­­ды. Бұл тар­мақтарды енгізбейінше, дауыс берген­дер­­дің нақты санын біле алмаймыз», деді Берік Дүйсембинов.

Жиын барысында ұжым қызметкерлері бірқатар түйткілді мәселеге тоқталды. Мыса­лы, несие өсімі, баға тұрақсыздығы, баспа­наның қол­жетімсіздігі туралы ойларын айтты. Кан­ди­дат­тар кәсіпорын мен еңбек ұжымын қолдай­ты­нын айтып, Парламентте «Ақ жол» фракциясы құрылғаннан кейін бұл мәселелерді Үкімет алдында көтеруге дайын екенін мәлімдеді.

Egemen Qazaqstan