Таяуда Астана қаласында «Ел жүрегі - Астана» атауымен жас жеткіншектер арасында республикалық жыр мүшәйрасы өтті. Әр аймақтың мықтылары жиналған додаға жүзге жуық оқушы қатысып, оларға ақын Ұларбек Нұрғалым мен Шерхан Талап, белгілі ақын Бауыржан Қарағызұлы, Қазақстан Республикасы Ұлттық академиялық кітапханасының директоры Үмітхан Дәуренбекқызы және Мәдениет министрлігінің сарапшысы Бекзат Смағұлов қазылық қылды.

Мүшәйраның шарты бойынша олар Астананы жырға қосып, жиырма жылдағы жетістіктерді бейнелі жеткізуі керек болды.

Бұл сайыста аудан намысын Махамбет атындағы орта мектептің оқушылары Шырайлым Исламғалиева мен Дильназ Борисова қорғап келді. Бұған дейін де бірнеше мәрте облыстық, республикалық жыр додаларда тек биіктерден көрініп жүрген Шырайлым мен Дильназдың өлеңдері қазылардың сынынан сүрінбей өтіп, бірінші байрақ ауданға бұйырды.

Әрине, осындай жыр байқауына баптап қосқан ұстаздары Ардақ Қайырлиева мен Назгүл Қыстаубаеваның еңбектері өлшеусіз екенін айта кеткеніміз жөн.

А.ДИАС

Жарсуат ауылы.