Индерборда спорт және балалар ойын алаңдары көбейе түспек. Бұл бағытта бірнеше жобаның жоспарда тұрғанын аудан әкімі Дарын Шамұратов тұрғындар жиынында атап өткен болатын.
Балалық балдәурен кезіміз өткен Кеңес Одағы шағында былғары доп түгілі, резеңке доптың өзі табыла бермеуші еді. Балалар ойнайтын алаңдар тек бөбекжайдың ауласында ғана болса, қазіргідей жарақтанған спорт алаңдары түсімізге де кірмейтін. Ал бүгінде Индербор кентінде балалар және спорт алаңдарының көптігінен санынан-ақ шатасатын жағдайға жеттік. Лайым да бұл алаңдарда ойнайтын балалар мен спортты серік еткен жандар көбейе берсін.
Айталық, Индербор кентінде былтыр ғана жаңа бой көтерген «Болашақ» пен «Шығыс» мөлтек аудандарында және «Барлаушылар» бөлігінде үш бірдей балалар ойын алаңы мен спорт алаңы пайдалануға берілген болатын. Енді, міне, биыл «Көктем» қазақ орта мектебі мен М.Әуезов атындағы орта мектеп аулаларына жаңадан спорт алаңдары салынуда. Жоба бойынша спорт алаңдарында шағын футбол, баскетбол және волейбол алаңдары, воркаут пен көше жаттығу алаңы қарастырылған. Оған жарықтандыру жүргізіліп, қауіпсіздігі үшін бейнебақылау жүйелері орнатылмақ. Аудан әкімі Дарын Шамұратов аталмыш спорт алаңының құрылыс жұмыстары алдағы қыркүйек айында аяқтау жоспарланып отырғанын айтты. Ал кенттегі Ш.Уәлиханов, С.Сейфуллин атындағы орта мектептің базаларында осындай ойын алаңдарының салынғанына да көп бола қойған жоқ.
Сонымен қатар, «Барлаушы» мөлтек ауданынан шағын футбол алаңы мен ангар типтес күрес залын салу, Индербор кентінен бассейн құрылысын жүргізу, «Болашақ» мөлтек ауданынан денешынықтыру кешенін салу, «Көктем» мөлтек ауданының №11 аймақ пен «АруАна» кешенінен спорт алаңы мен балалар ойын алаңдарының салуға жоба жасақтау үшін құжаттар жасалуда екен. Әсіресе, Индербор кентінен көптен күткен стадион құрылысын жүргізуге жоба жасақталуда. – Аталған жобаларымыз іске асқан жағдайда, Индербор кентінің барлық мөлтек аудандарының өз ойын алаңдары пайда болып, жастарымыздың бос уақыттарын тиімді өткізуіне үлкен мүмкіндік туады, – деді аудан әкімі Дарын Дүйсембайұлы.
С.БАЗАРБАЕВ
