Бүгінде жұмыссыздық мәселесі еліміз бойынша өзекті. Оны жою мақсатында бірқатар шаралар қолға алынып, түрлі бағдарламалар қабылдануда. Мемлекет басшысының Жарлығымен 2025 жыл «Жұмысшы мамандықтарының жылы» болып жарияланды. Бұл қоғам үшін маңызды әрі өзекті қадам. Ал, ол экономика мен өндірісті дамытуға ғана емес, сонымен бірге жастардың еңбекке деген көзқарасын жаңғырта түсетіні сөзсіз.
Қазіргі таңда «жұмыс жоқ» деген желеумен екі қолға бір күрек таппай жүрген жандар жетерлік. Әрине, бұл жақсы қасиет емес. Ал, масылдықтың алдын алатын бірден-бір жолы – жұмыссыздарды жұмысқа тартып, еңбекке араластыру. Осы орайда, аудандық «Мансап» орталығының ұйымдастыруымен бос жұмыс орны жәрмеңкесі жиі өтіп тұрады. Әйтсе де, «Жәрмеңкеден нәтиже қандай? Одан кімдер жұмыс тапты?» деген сұрақтар қылаң береді. Міне, сол сауалдарға жауап іздегенді жөн көрдік.
Қойылар талабы қандай?
Жалпы, жұмыссыз тұрғындарды жұмысқа орналастырудың бірнеше жолы бар. Соның бірі – бос орындар жәрмеңкесі. Себебі мемлекеттік бағдарламалар арқылы емес, бос жұмыс орнын ұсынып отырған кәсіпкерлердің өзін тікелей шақыру арқылы жүргізіледі. Жұмыс беруші бірнеше кандидатпен сұхбат құру арқылы өзіне қажетті маманды таңдайды. Бір жағынан бұл жұмыс іздеушіге де ыңғайлы. Азамат бірнеше жұмыс жайлы сөйлесіп, өзіне қайсысы ыңғайлы, соны таңдауына мүмкіндік бар. Бұл шараны жұмыссыздар мен жұмыс берушілер арасындағы алтын көпір деуге болады. Мұндай шаралардың жемісін көріп, жұмыс тапқандар да бар.
Жәрмеңке өткізудегі негізгі мақсат – жұмыс беруші мен жұмыс іздеуші арасындағы тікелей байланыс арқылы жұмыссыз азаматтарды, білім беру ұйымдарының түлектері мен жастарды жұмысқа орналастыруға жәрдемдесу, жол ашу, жұмыспен қамту. Бос жұмыс орындар жәрмеңкесі барысында жұмыс берушілер өз компанияларының презентациясын өткізіп, бос вакансияларын ұсынып, өздеріне ең қолайлы кандидаттардың базасын қалыптастырады. Жұмыс іздеушілер, өз кезегінде компаниялардың менеджерлерімен тілдесіп, сұхбаттасудан өтіп, өзін қызықтырған сұрақтарын қоя алады.
Сіз не дейсіз?
35 жұмыссыз жұмыс тапты
Әлеуметтік қолдау шаралары аясында жұмыссыздарды, жұмыссыз борышкерлерді, пробация есебінде тұрған, «Теңізшевройл» жауапкершілігі шектеулі серіктестігі Келешек кеңею жобасынан босатылған жұмыссыздарды жұмысқа орналастыру мақсатында «Бос жұмыс орындары» жәрмеңкесі өткен жылы төрт мәрте өткізілді. Жәрмеңкеге аудан көлеміндегі жер қойнауын пайдаланып отырған мұнай компаниялары, Теңіз қалашығындағы және аудандық мекемелерге әр жәрмеңке сайын хат жолданып, бос жұмыс орындары туралы ақпарат сұратылады. Десе де, барлығы бірдей жауапкершілік танытпайды. Өткізілген төрт жәрмеңкеде 65 мекемеге хат жолданса, оның 55-і ғана қатысты.
Ауданда жер қойнауын пайдаланып отырған және Теңіз қалашығындағы мұнай компаниялары, ауданға қарасты бөлімдер мен мекемелер өздерінде бар бос жұмыс орындарын ұсынды. Жәрмеңке қорытындысымен жұмыс іздеушілердің түйіндемелері жинақталып, мамандықтары бойынша тиісті мекемелерге жіберіледі. Нәтижесінде, өткен жылы отыз бес жұмыс іздеуші жәрмеңкеден жұмыс тапты. Негізінен қазіргі таңда есепші, психолог, дефектолог-логопед, аспаз, заңгер, вахталық әдісте жұмыс жасайтын инженерлер, «Д» санатты жүргізушілерге сұраныс жоғары. Вахталық жұмыс ұсынатын мекемелер және жергілікті жердегі мекемелер жұмыс іздеушінің еңбек өтіліне, біліктілігіне және жұмыс іздеушінің жұмысқа деген ынтасына баса назар аударады. Қазіргі таңда ауданда 1368 адам жұмыссыз ретінде тіркелген, оның ішінде 485 адам субсидияланатын жұмыс орнына және тұрақты жұмысқа 73 адам жолданды. Ал, 343 адам әлеуметтік төлем алушы.
Биыл «Бос жұмыс орындар» жәрмеңкесін алты мәрте өткізу жоспарлануда. Соның бірі жақында «Арман» мәдениет үйінде болып өтті. Оған 45 адам қатысты. Аудан көлеміндегі жер қойнауын пайдаланып отырған мұнай компаниялары, Теңіз қалашығындағы және аудандық 12 мекемеден 72 бос жұмыс орындары бойынша қатысқандарға мамандықтары бойынша жұмыстар ұсынылды. Жәрмеңкеге аудандық полиция бөлімі бастығының кадр саясаты жөніндегі орынбасары Ақниет Төкенов, аудандық білім бөлімінің бас маманы Қанат Алпанов, Миялы балалар өнер мекетебінің директоры Дана Маделбекова және аудандық жұмыспен қамту және әлеуметтік бөлімінің бас маманы Сәнімгүл Жұбаевалар қатысып, жергілікті жұмыссыздарға жұмыс барысы жөнінде түсінік жұмыстарын жүргізіп, бос жұмыс орындарын ұсынды. Соңында жұмыс іздеушілердің түйіндемелері жинақталып, мамандықтары бойынша тиісті мекемелерге жіберілді.
Нұрлан Бекешов,
аудандық «Мансап» орталығының директоры
«Адам таппаймыз»
Жәрмеңкеге жиі қатысамыз. Бірақ, жұмысқа адам таппаймыз. Бәрі бізден асып вахталық жұмысқа, одан қалды қоғамдық жұмысқа құмар. Қазір трокторшы, жүк тасушы, мал бағушы сияқты мамандар керек. Айлығы да 200 мың теңгеден кем емес. Осыған адам келмейді. Бәрі жеңілдің асты, ауырдың үстімен жүріп ақша тапқанды қалайды.
Тіпті екі қолға бір күрек таппай жүріп жұмыс талғайтындары да бар. Қоғамдық жұмысқа әуес. Бұлай біз халықты еріншектікке, масылдыққа алып келеміз. Ұсынған жұмысқа бармаған жұмыссыздарды жұмыссыздар тіркеуінен мүлдем шығарып тастау керек. Сонда ғана ойланар.
Қайырбек БАЙМҰРАТОВ
жеке кәсіпкер
«Түйіндемеңізді тастап кетіңіз, хабарласамыз»
Осыдан екі-үш жыл бұрын өзім жұмыс жасайтын компанияда қысқарту болып, жұмыстан қысқарып қалдым. Ауылға келіп жұмыссыз ретінде тіркелдім. Содан «жұмыс болса хабарласамыз» деген жауап алдым. Бір ай өткен соң «бос жұмыс орындар жәрмеңкесі өтеді» деп орталық мамандары хабарласты. Түйіндемемді алып барып, мамандығыма сай вахталық жұмыс ұсынатын мекемелерге жолықтым. Барлығы «түйіндемеңізді тастап кетіңіз, хабарласамыз» деді. Бірақ, ол мамандардан хабар болмады. Бірге барған жігіттерде осындай жауап алған. Таныстарымның көбі «жәрмеңкеде жұмыс жоқ қой» деп налиды.
Қанат АМАНКЕЛДІ,
Миялы ауылының тұрғыны
Түйін.
Сайып келгенде, жұмысшы мамандықтарына басымдық беріліп, қолдау көрсетуде. Бұл ретте бос жұмыс орындарының жәрмеңкесі нәтижесіз емес. Десе де жұмыс беруші де, жұмысшы да өз жұмысына құлықсыздық танытпауы керек.
Гүлмира МАҚСОТҚЫЗЫ
Қызылқоға ауданы
