Х.Досмұхамедұлы атындағы Атырау университетінде экономика және құқық факультеті, азаматтық құқықтық пәндері кафедрасы және Атырау облысы Полиция департаментінің ұйымдастыруымен “Заң және тәртіп” жобасы аясында студенттермен құқықтық маңызы зор кездесу өтті.
Шараның мақсаты – студенттердің құқықтық мәдениетін арттыру, құқық қорғау органдарының қызметімен таныстыру және кәсіби бағдар беру.
Кездесуге дінтанушы, тарихшы Ернар Абзалұлы, есірткі қылмысына қарсы іс-қимыл басқармасының полиция подполковнигі Марьяна Джанғалиева, бас криминалист Жәрдем Тағаев, киберқылмысқа қарсы іс-қимыл басқармасының полиция капитаны Дәурен Мұханбетәлиев және полиция капитаны Айдын Лұқпанов қатысты.
Спикерлер жастар арасында діни сауаттылық, есірткі қылмысының алдын алу, криминалистика, киберқылмыстардың түрлері және полиция органдарына жұмысқа орналасу тәртібі туралы маңызды ақпарат берді.
Іс-шара Студенттер күнімен орайласып, Заң клиникасының белсенді студенттеріне Алғыс хаттар мен сыйлықтар табысталды.
Шара соңында кинолог мамандар «Хан» атты қызметтік иттің көмегімен есірткі затын анықтау тәсілін көрсетіп, студенттерге практикалық тәжірибе ұсынды.
Х.Досмұхамедұлы атындағы Атырау университетінде интернет алаяқтықтың алдын алуға арналған кездесу өтті.
Х.Досмұхамедұлы атындағы Атырау университетінің «Экономика және құқық» факультеті, «Қылмыстық-құқықтық пәндер» кафедрасы және «ЖАҢАРУ» Сыбайлас жемқорлыққа қарсы жалпыұлттық қозғалысы РҚБ Атырау облыстық филиалы бірлесіп, «Интернет алаяқтық қылмысынан сақ болайық» тақырыбында құқық қорғау органдары өкілдерімен кездесу ұйымдастырды.
Іс-шара «Заң мен тәртіп» қағидатын ілгерлету және жастардың құқықтық сауаттылығын арттыру мақсатында өткізілді.
Кездесуді Х.Досмұхамедұлы атындағы Атырау университетінің Басқарма төрағасы–ректоры, «ЖАҢАРУ» қозғалысы Атырау облыстық филиалының директоры С.Н. Идрисов ашып, интернет алаяқтықтың қоғамдағы өзекті мәселелердің бірі екенін атап өтті. Ол құзырлы органдардың бұл бағыттағы жұмысы мен азаматтардың ақпараттық сауаттылығын арттырудың маңыздылығын ерекше тоқталды.
Кездесу барысында қатысушылар интернет кеңістігінде жиі кездесетін фишинг, дипфейк, онлайн саудадағы және инвестициялық алаяқтық, SMS және мессенджерлер арқылы жасалатын қылмыс түрлерімен танысып, олардың алдын алу жолдары түсіндірілді. Сонымен қатар интернеттегі жеке деректерді қорғау, қауіпсіздік дағдыларын қалыптастыру бойынша бейнематериалдар көрсетілді.
Кездесу соңында университет ректоры Саламат Идрисов қатысушыларға алғыс хаттар табыстап, интернет алаяқтықтың алдын алу бағытындағы түсіндіру жұмыстарының жалғасатынын айтты.
