Абай облысында Жеңістің 80 жылдығына орай «Ардағым – ардагерім» акциясы өтіп жатыр. Ардагерлерге құрмет көрсету, олардың ерлігін жас буынға үлгі мақсатында «Абай жастары» жастар ресурстық орталығы мен «Qazaqstan Medisina Jastary» республикалық қоғамдық бірлестігі осынау акцияға мұрындық болып жүр.
Бұл ізгілікке толы іс-шара аясында жастар тыл ардагері Ақан Ахатованың шаңырағына арнайы барып, құрмет көрсетті. Ардагерге алғыс айтылып, медициналық көмек көрсетілді. Сонымен қатар азық-түлік себеті мен сый-сияпаттар табысталды.
Ақан Ахатова сол бір зұлмат жылдарды еске алып, қазіргі бейбіт заманның қадірін бағалауға шақырды.
– Соғыс жылдарында әйелдер мен балалар таңнан кешке дейін еңбекке жегілді. Көп нәрседен таршылық көрдік, бірақ Отан үшін, елдің амандығы үшін барымызды салдық. Әрбір майданнан келген хат үміттің сәулесі еді. Ал Жеңіс туралы хабар бар халықтың көз жасымен қарсы алған қуанышы болды. Бүгінгі бейбіт өмірге қарап, сол күндер еске түседі. Шүкір деймін. Қазір ел тыныш, жастар білім алып, еңбек етіп жүр. Менің арманым – осы бейбіт күннің қадірін біліп, соғыс деген сөзді тек тарихтан оқитын ұрпақ өссе деймін. Елге, жерге деген сүйіспеншіліктеріңізді жоғалтпаңыздар. Бірлікті бағалаңыздар. Тек алға ұмтылып, ел игілігі үшін еңбек етіңіздер, – деді тыл ардагері.
«Ардағым – ардагерім» бір күндік акция емес, бұл жас ұрпақтың жалғастыра жүрер жақсы бір қадамы деп түсінсек те болады.
– Сіздердің еңбектеріңіз – біз үшін тәрбие мектебі. Бүгінгі бейбіт өмір сүріп, білім алып, азат жүргеніміз – ардагерлердің арқасы. Мұның бәрі – сіздер сияқты аға буынның жанқияр еңбегінің жемісі. Жас ұрпақ сол тәлімді жалғастырып, еліміздің болашағы үшін адал еңбек етуге тиіс. Сіздерге деген құрмет әрқашан ортаймайды, – деді белсенді азамат Ерсінбек Өрлеубек.
Абай облысы
