Құлсарыдағы «Anyq Soile» түзету-дамыту орталығы «Жарқыра» бағдарламасының қолдауымен материалдық-техникалық базасын нығайтып, мамандардың біліктілігін арттыру мүмкіндігіне ие болды. Енді орталық сөйлеу тілі дамуы кешеуілдеген, мінез-құлығындағы ерекшеліктері бар, сондай-ақ кәсіби қолдауды қажет ететін балаларға арналған бағдарламаларды сапалы түрде ұсына алады.
«Anyq Soile» ерте түзетуге, сөйлеуді дамытуға, танымдық және әлеуметтік дағдыларды қалыптастыруға бағытталған, сонымен қатар отбасылар үшін қауіпсіз әрі қолайлы орта жасайды. Мұнда логопедиялық және дефектологиялық сабақтар жүргізіліп, ойын әдістері қолданылады, әр балаға жеке білім беру маршруты әзірленеді, мамандар отбасыларды түзету жұмысының барлық кезеңінде сүйемелдейді. Қазіргі уақытта орталықта шамамен 30 бала білім алады, ал екі жыл бұрын тек 5 тәрбиеленуші болды. Сол уақыт ішінде 10 бала сәтті оңалудан өтіп, сөйлеу, мінез-құлық және коммуникация дағдыларында айтарлықтай өзгерістерге қол жеткізді.
Орталықтың негізін қалаушы, логопед-дефектолог Акбота Советова күнделікті отбасылардың білікті түзету көмегіне деген қажеттілігін көріп, бұл орталықты ашуды шешті. «Мен әрқашан балаларға көмектесуді маңызды деп санадым. Көптеген балаларға нәзік, жүйелі және кәсіби қолдау жетіспейді. Сол себепті «Anyq Soile» пайда болды — әр бала өз әлеуетін аша алатын орын», — дейді орталық жетекшісі.
Орталық дамуының маңызды кезеңі — Акботаның «Жарқыра» әлеуметтік кәсіпкерлікті дамыту бағдарламасына қатысуы. Бағдарлама арқылы мамандардың кәсіби біліктілігі артты, орталыққа қажетті заманауи жабдықтар алынды. Алматыдағы стажировкада ол «Тәтті тіл» орталығында заманауи әдістемелермен танысып, тәжірибе алмасты.
«Балалардың дамуына және жергілікті қауымдастықты қолдауға бағытталған жобаларды қолдау — біздің әлеуметтік жауапкершілігіміздің маңызды бөлігі. Ақботаның “Жарқыра” бағдарламасына қатысуы Құлсарыда балаларға сапалы көмек алуға жағдай жасағанына қуаныштымыз», — деді ТОО «Теңізшевройл» өкілі Нұрлан Ерғалиев.
Алдағы жылдары орталық кеңейіп, қосымша мамандар тартуды, жаңа бағыттарды — АВА-терапия, емдік дене шынықтыру, психологиялық сүйемелдеуді — іске қосуды жоспарлап отыр.
