2024-2025 оқу жылында бастауышта білім алатын 60 мыңдай оқушы және 5-11 сынып аралығындағы әлеуметтік осал топ санатынан шыққан 11 мыңнан астам бала тегін ыстық тамақпен қамтылды,- деп хабарлайды Өңірлік коммуникациялар қызметі.
Бұл шара мектеп оқушыларының денсаулығын жақсарту, олардың білім алуға көңіл бөлуін арттыру мақсатында жүзеге асырылуда.
- Атырау облысындағы оқушыларды тегін тамақпен қамтамасыз ету жұмыстары білім беру сапасын арттыру мен әлеуметтік теңдікті қамтамасыз ету жолындағы үлкен бастама. Қазір бір балаға ас мәзірі бойынша қарастырылған тамақтандырудың орташа құны 600 теңгені құрайды. Тегін ыстық тамақпен қамтамасыз ететін 33 жеке кәсіпкер бар және олар «Catering Atyrau» тамақтандыру қауымдастығына орталықтандырылған. Бұл қауымдастық әкімдікпен бірлескен тиісті жұмыстарды атқарып, қауіпсіздік талаптарын толық сақтап келеді,-деді Атырау облыстық білім беру басқармасының бөлім басшысы Дулат Хамзин.
Оқушыларға тек диеталық пайдалы тағамдар ұсынылады. Бұл балалардың дұрыс тамақтануы мен қауіпсіздігі үшін сеп болмақ.
- Бүгінгі ас мәзірі бойынша ыстық тағамға көкөніс бұқтырмасы, сусынға с дәрумені қосылған кисель және бидай ұнынан жасалған нан ұсынылады . Бұл тағамдар әр балаға жас ерекшеліктеріне сай өлшеніп беріледі. Мысалы 1-4 сынып оқушыларына 200 грамм, 5-11 сыныпты 250 грамм ыстық тағаммен қамтамасыз етеміз,- деді асхана менеджері Райхан Абдрахманова.
- Тегін тамақтану жобасы мектеп ата-аналарына ұнайды. Себебі күнде жаңа ас мәзірін арнайы кестеден көріп, балаларымыздың қалай тамақтанып жатқанын біле аламыз. Сонымен қатар оқушылардың тамақтану мәдениеті де жақсы қалыптасуда,- деді ата-ана Алтынай Наурызбаева.
Айта кетейік, тамақтандыру мәселесі және тамақ сапасын қадағалау үшін білім беру ұйымдарында 224 бракераждық комиссия жұмыс істейді. Биыл жеті аудандық, бір қалалық, бір облыстық ведомствоаралық сараптамалық топтар құрылды.
