Бүгін, 2 сәуірде, Атырауда 22-ші Солтүстік-Каспий аймақтық «Atyrau Oil&Gas» көрмесі өз жұмысын бастады. Сол күндері Солтүстік-Каспий аймақтық «AtyrauBuild» құрылыс және интерьер көрмесі де қатар өтуде.
Көрме мемлекеттік құрылымдар мен мұнай-газ кәсіпорындарының өкілдерінің қатысуымен таныстыру турынан басталды. Құрметті қонақтар қатарында Атырау облысы әкімінің орынбасары Дарын Шамұратов, Қазақстан Республикасының Энергетика министрлігінің Мұнай-газ химиясы және техникалық реттеу департаментінің директоры Темірлан Уркумбаев, KAZENERGY Қауымдастығының Бас директоры Жандос Нұрмағанбетов, «Каспий Құбыр Консорциумы» АҚ Қазақстан Республикасы Үкіметімен байланыс жөніндегі Бас директордың орынбасары Қайыргелді Қабылдин, North Caspian Operating Company Бас директоры Рую Джанкарло, PetroCouncil Қазақстанның мұнай-газ кеңесінің төрағасы Асылбек Джакиев, Астана қаласындағы Италия елшілігі миссиясы басшысының орынбасары Петито Аниелло, Италияның Қазақстандағы I.C.E сауда өкілдігінің Директоры - Италияның Қазақстандағы Елшілігінің Сауда алмасу бөлімін дамыту жөніндегі жетекші (ICE/ITA Агенттігі) Мартино Кастеллани болды.
Атырау облысы әкімінің орынбасары Дарын Шамұратовтың айтуынша, «Atyrau Oil&Gas» және «AtyrauBuild» көрмелері мұнай-газ секторында инновацияларды дамыту және инвестиция тарту үшін маңызды алаң болып саналады.
- Атырау облысы – Қазақстан экономикасының негізгі драйверлерінің бірі екені сіздерге мәлім. Мемлекет басшысының тапсырмасына сәйкес мұнай-газ химия саласын дамытуға ерекше көңіл бөлінуде. Біздің басты міндетіміз – осы салаға жаңа технологияларды енгізу және өндіріс тиімділігін арттыру. Мұндай шаралар халықаралық ынтымақтастықты нығайтуға және өңіріміздің әлеуетін ашуға ықпал ететініне сенімдімін, – деп атап өтті Атырау облысы әкімінің орынбасары Дарын Шамұратов.
Экспо-шаралар – билік өкілдері, жетекші компаниялар мен сала сарапшылары бас қосып, өзекті мәселелерді талқылайтын, жаңа әріптестер іздейтін және мұнай-газ секторы мен құрылыс саласындағы озық технологияларды таныстыратын басты іскерлік алаң. Біріккен экспозиция аясында өздерінің соңғы әзірлемелерін 10 елден: Австрия, Германия, Италия, Қазақстан, Қытай, Нидерланды, БАӘ, Пәкістан, Ресей және Сингапурдан келген 97 компания ұсынды.
KAZENERGY Қауымдастығының бас директоры Жандос Нұрмағанбетовтың айтуынша, көрме – бұл мұнай-газ саласының жетекші мамандарын жыл сайын жинайтын, тәжірибе алмасуға, өзекті мәселелерді талқылауға және жаңа іскерлік байланыстар орнатуға мүмкіндік беретін маңызды шара.
- Мұнай-газ саласы Қазақстан экономикасында маңызды рөл атқарып, энергетикалық қауіпсіздікті қамтамасыз етеді, инвестициялар тартады және елдің ЖІӨ-нің айтарлықтай бөлігін құрайды. Атырау – тарихи түрде елдің мұнай-газ секторының орталығы болған Қазақстанның мұнай-газ саласының флагманы. 2024 жылы аймақта 50 млн тонна мұнай (ел бойынша жалпы өндірістің 57%) және 26,5 млрд текше метр газ (республика бойынша жалпы өндіріс көлемінің 44,9%) өндірілді, - деп атап өтті өзінің құттықтау сөзінде KAZENERGY қауымдастығының бас директоры Жандос Нұрмағанбетов.
Алғаш рет өз стендтерін қатысушылардың 61%-ы ұсынды, бұл шараға деген жоғары қызығушылықты және оның сала үшін маңыздылығын растайды. Сонымен қатар, көрме аясында 11 экспонент салаға арналған арнайы техника, жабдықтар және инновациялық шешімдерін ұсынған ауқымды көше экспозициясы ұсынылды.
Биыл ерекше назар 18 жетекші өндіруші біріктірілген Италияның ұлттық экспозициясына аударылды. Компаниялар мұнай-газ саласы үшін шешімдердің кең ауқымын, соның ішінде технологиялық процестерді автоматтандыруға арналған жабдықтар, сапа бақылау жүйелері, деректерді мониторингтеуге арналған бағдарламалық қамтамасыз ету, сондай-ақ клапандар мен фитингтер сияқты компоненттерді ұсынуды. Италияның стенді инновациялық әзірлемелермен танысуға, серіктестік байланыстар орнатуға және сала көшбасшыларымен тәжірибе алмасуға мүмкіндік береді.
ҚР-дағы Италия Елшілігінің Сауда алмасуды дамыту бөлімінің директоры Мартино Кастеллани атап өткендей, итальяндық компаниялардың Атыраудағы көрмеге қатысуы Италия мен Қазақстан арасындағы мұнай-газ саласындағы жоғары деңгейдегі ынтымақтастықты растайды.
- Біздің компаниялар мұнай-газ секторына арналған жабдықтардың кең ауқымын – бекітпелер мен клапандардан бастап, өртке қарсы жүйелер мен өлшеу құралдарына дейін ұсынуда. Кейбір итальяндық кәсіпорындар Қазақстанда өкілдіктерін ашқан, ал басқалары үшін бұл жергілікті нарықпен танысуға алғашқы мүмкіндік. Көрме аймақтық сипатта болғанымен, итальяндық бизнестің оған қызығушылығы жоғары болды. Біз үшін Қазақстан – мұнай-газ саласындағы стратегиялық әріптес. Ынтымақтастықты кеңейту үшін үлкен әлеует көріп отырмыз, - деп атап өтті Мартино Кастеллани.
Бүгінгі таңда Атырау облысы Қазақстанның мұнай-газ өнеркәсібінің орталығы болып саналады, мұнда Теңіз, Қашаған және Қарашығанақ сияқты ірі жобалар жүзеге асырылуда. Сондықтан көрме келушілерге жетекші мұнай-газ компанияларының, мемлекеттік органдардың, жабдықтар мен қызметтер жеткізушілерінің өкілдерімен, сондай-ақ әлеуетті серіктестермен кездесу мүмкіндігін береді.
Көрменің үш күндік қарқынды іскерлік бағдарламасын мемлекеттік органдардың өкілдері, тәжірибелі сарапшылар, саланың ірі ассоциациялары мен одақтарының өкілдері қатарынан ондаған спикер қамтамасыз етеді.
Ертең, 3 сәуірде, іскерлік бағдарлама сатып алу процесстерін тереңдетіп талқылауға арналатын болады. Іскерлік бағдарлама аясында Теңізшевройл, NCOC және KPO компанияларының семинарлары өтеді. Сондай-ақ, ППК «Махамбет» (TEXOL компаниялар тобы) және ТОО «Kazakhstan Petrochemical Industries Inc.» кәсіпорындарына өндірістік экскурсиялар мен пресс-турлар ұйымдастырылады.
«Atyrau Oil&Gas» көрмесі сала үшін маңызды шара болып қалуда, ол жаңа серіктестіктердің қалыптасуына, инновациялық шешімдерді енгізуге және мұнай-газ секторының негізгі міндеттерін шешуге ықпал етеді.
22-ші Солтүстік-Каспий аймақтық «Atyrau Oil&Gas» және Солтүстік-Каспий аймақтық құрылыс және интерьер «AtyrauBuild» көрмесінің жұмысы 4 сәуірге дейін жалғасады.
