Атырау қаласында көпқабатты тұрғын үйлердің сыртқы келбетін жақсарту және қаланың бірыңғай сәулеттік стилін сақтау мақсатында қаулыға өзгерістер енгізіледі деп хабарлайды AtyrauPress.
Бұл туралы қала әкімдігінің көппәтерлі үйлерді жөндеу қағидаларын жаңарту жөніндегі жобасында жарияланды. Бұрын көпқабатты үйлердің қасбеттері мен шатырларын жөндеу барысында нақты бірізді талаптар болмағандықтан, әр үй әртүрлі материалдармен және түстермен жөнделіп келген. Бұл қаланың жалпы көрінісінің үйлесімсіз болуына себеп болған еді. Жаңа өзгерістер бойынша үйлердің сыртқы қабырғаларын және шатырларын жөндеу кезінде қолданылатын материалдардың сапасы мен үйлердің түс схемасы нақты белгіленеді. Сонымен қатар, жөндеу және реконструкциялау жұмыстарын ұйымдастыру тәртібі нақтыланып, барлық процесс ашық әрі стандартталған түрде жүргізілетін болады. Осылайша қаланың сәулеттік келбеті бірізді әрі үйлесімді болып, тұрғындардың жайлылығы мен қауіпсіздігі қамтамасыз етіледі. Атыраудағы көпқабатты үйлерді жаңғырту жұмыстары тек сыртқы келбетті жақсарту үшін ғана емес, сонымен қатар тұрғындардың қауіпсіздігін арттыруға, энергияны үнемдейтін технологияларды енгізуге, инженерлік инфрақұрылымды жаңартуға және тұрғын үй қорының ұзақ мерзімділігін қамтамасыз етуге бағытталған. Сондай-ақ әлеуметтік осал топтарға жөндеу кезінде қолдау көрсету механизмдері де қарастырылған. Жоба 2025 жылғы 19 желтоқсанға дейін қоғамдық талқылауға ұсынылады және осы уақыт аралығында қала тұрғындары өз пікірлерін білдіре алады.
