Атырау облысының жас таланттары 2025 жылы желтоқсан айында Астана қаласында өтетін «WorldSkills Kazakhstan» республикалық чемпионатына қатысу үшін жолға шықты. Биылғы чемпионат Жұмысшы мамандықтар жылы аясында 10-шы рет ұйымдастырылмақ. Сонымен қатар, биылғы жарыстарда қатысушылардың кәсіби құзыреттері айтарлықтай артты: егер өткен жылы бәсекелер 30 құзырет бойынша өткізілген болса, биыл бұл көрсеткіш 45-ке жетіп отыр. Бұл жаңа кәсіби бағыттардың енгізілгенін және жастардың заманауи еңбек нарығына бейімделу мүмкіндіктерінің кеңейгенін айқын дәлелдейді.
Атырау облысынан 10 колледждің 36 студенті қатысып, өз кәсіби шеберліктерін танытады. Солардың қатарында әлемдік деңгейдегі APEC PetroTechnic жоғарғы колледжінің студенттері де бар. Олар чемпионат алаңында өз өнерін көрсетуге ниет білдіріп, келесі құзыреттер бойынша бақ сынайды:
- 3D модельдеу – компьютерлік ойындарды жасау және көркем жобалау шеберлігі;
- Веб-технологиялар – заманауи веб-сайттар мен онлайн платформаларды әзірлеу дағдылары;
- Өнеркәсіптік автоматика – өндірістік процестерді автоматтандыру және басқару;
- Мобильді қосымшаларды әзірлеу – смартфон мен планшетке арналған инновациялық қолданбаларды жасау.
Бұл чемпионат жас мамандарға өз кәсіби деңгейін шыңдауға мүмкіндік беріп қана қоймай, Атырау облысының білім беру жүйесінің сапасын танытуға да жол ашады. Сонымен қатар, жастар халықаралық деңгейде өз дағдыларын көрсету арқылы тәжірибе жинап, жаңа кәсіби құзыреттерді меңгеру мүмкіндігіне ие болады.
«WorldSkills Kazakhstan» алаңы – бұл тек бәсеке емес, бұл – жастарға өз қабілеттерін көрсетуге, еңбек нарығының талаптарына бейімделуге, кәсіби болашағын сенімді қадамдармен бастауға мүмкіндік беретін алаң. Әрбір қатысушы өз шеберлігін шыңдай отырып, өңірдің атын әлемдік аренада танытады және Қазақстанның кәсіби мамандар дайындау саласындағы беделін арттырады. Осылайша, Атырау студенттерінің жарысқа аттануы – өңірдің білім мен шеберлікке берілген қолтаңбасы және жас ұрпақты кәсіби кемелдікке жетелейтін маңызды қадам болып отыр.
