Жақында аудандық музейде жастар арасында ұлттық құндылықтар мен дәстүрді насихаттау мақсатында «Тәрбие бастауы анадан» атты жас аналар байқауы өтті. Оған Индербор кентімен қоса, Жарсуат, Есбол, Ынтымақ және Аққала ауылынан 5 үміткер қатысты.

Алдымен аудандық жастар ресурстық орталығының басшысы Сұңқар Көшеков бүгінгі байқауды өткізіп отыруымыздың себебі көрген тәрбиелерін өнеге етіп, бір-бірімен тәжірибе алмасу екендігін айтып, қатысушыларға сәттілік тіледі.

Төрт кезеңнен тұратын сайыстың алғашқы таныстыру бөлімінде қатысуышалар өзі мен отбасы туралы бейнекөрсетілім дайындап, бірі - қарасөз, бірі - көркемсөз арқылы жеткізсе, енді біреулері – әнге арқау етіп, бірі – монологпен тебірене айтып берді. Ал екінші «Қолөнер – сырлы өнерде» үйден дайындап әкелген күнделікті тұрмыста пайдаланып жүрген құрақ көрпе, қоржын т.б. түрлі бұйымдарын көрсетсе, келесі «Салт-дәстүрді білеміз бе?» бөлімінде салт-дәстүрге байланысты сұрақтарға жауап берді. Соңғы «Шебердің қолы ортақ» кезеңінің шарты бойынша 5-7 минут аралығында қолдарындағы құралдармен бұйым жасап шығарды.

Байқау соңында әділқазылар алқасы мен аудандық әйелдер кеңесінің төрағасы Светлана Жанғали байқаудың жақсы деңгейде өткенін айта келе, жүлдегерлерге марапат ұсынып, қатысушыларға бағалы сыйлықтар табыс етті. Нәтижесінде, бас жүлде аққалалық Бақтыгүл Қабдирова, ІІ орын есболдық Амангүл Жұмағалиева, ІІІ орын ынтымақтық Ақнұр Қалиоллинаға бұйырды, ал индерборлық Әсем Ұлданова мен жарсуаттық Лаура Қуанышбаева Алғыс хатқа ие болды.

Міне, «Бір қолымен – бесікті, бір қолымен – әлемді тербеткен» аналар осындай ибалылық пен инабаттылықты бойына жиып, аяулы жар, асыл ана, сүйікті келін атанып отырса, қоғамдағы ажырасу, тәртіпсіз ұрпақ мәселесі қозғалмас еді.

Ақмарал ТӨЛЕГЕНҚЫЗЫ